Mizo mipa population kiam chak lutuk hi buaipui tham a ni - Opposition Leader

Opposition leader Lalchhandama Ralte chuan, kum khat chhunga Mizorama mitthi zinga 65% chu mipa an nih thu sawiin, Mizo mipa an kiam chak lutuk chu buaipui tham a nih thu a sawi.

Lalchhandama Ralte hian October 21, Thawhlehni zana Sakawrdaia YMA Inkhawmpui Lian vawi 75-na palai lawmna inkhawmah thu sawiin, "Mizoram mipa population kiam chak lutuk hi buaipui tham a ni. Kumina Economics & Statistics-in data/statistic chi thum a tihchhuahah kum khat chhunga mitthi zinga 35% chu hmeichhia an nih laiin, 65% chu mipa an ni. Kum 10 chhunga nau piang 51% mipa leh hmeichhia 49% an ni. Mitthi zinga 42% chu ṭhalai kum 15-54 inkar an ni a, ṭhalai thite zinga 75% chu mipa an ni," a ti.

Ram chhan ngam ṭhalai an tam thu sawiin Lalchhandama chuan, "Kan ram a chhe vek tawh, ṭhalaite an chhe tawh tia zirtirna him lo leh ṭhalaite tibeidawng thei tura thusawi an awm ṭhin. Mahse, zaninah heti zat ṭhalai rual ram leh hnam tana ding ngam kan la awm hi a ropuiin a lawmawm tak zet," a ti a; ṭhalai tlemtê kawng dik lo zawhte vanga chhe ta vek anga sawi chu a him loh thu a sawi.

Tuivawl bialtu MLA chuan, rambuai vangin hmar tlangdungah hun rei tak chhung YMA a ding thei lo tih sawiin, "Development pawh a lut ngai lo a, hmar thimpui tih ṭawngkamte kan hre thin. Remna leh muanna awm hnuah hmasawnna a lo lut zel a, Sakawrdaiah ngei YMA Inkhawmpui Lian kan thleng ta hian hnuk a tiulh thei a ni," a ti.

Mizoram leh hmar tlangdungah hmasawnna a lut zel dawn tih sawiin Lalchhandama chuan, "Hmar tlangdung hi NH02 leh 306A kaltlangin kawtchhuah thar kan la ni dawn. Kan hnam himna tura inven leh ruihhlo do kawngahte theihtawp chhuah turin mawhphurhna kan nei," a ti a; YMA motto vawng nung reng turin inkhawmpui palaite a chah.

Lalchhandama Ralte hian YMA Inkhawmpui Lian souvenir a tlangzarh nghal a ni.