KHAWTHLIR

Sihhmui kai Tlawng lei zawh theih tawh

Aizawl West-I bialtu MLA TBC Lalvenchhunga leh Lunglei North bialtu MLA V Malsawmtluanga te chuan nimin khan Tlawng lui Sihhmui kaia lei dawh an enfiah. TBC Lalvenchhunga chuan, lei dawh thar chu lirthei tê chi (LMV chin hnuai lam) kal theiha peih a ni tih a sawi a; lei dawhtute'n October 22, 2025-ah chuan LMV chin hnuai lam kal thei tura an peih tur thu an lo sawi tawh anga an peih hman chu lawmawm a tih thu a sawi bawk.

Thisen pe

Institute of Advance Studies in Education chuan nimin khan an hmunah thisen pek an huaihawt a, mipa 45 leh hmeichhia 32 ten Civil Hospital, Aizawl tan thisen unit 77 an pe. 2nd Battalion MAP pawhin nimin khan Civil Hospital, Lunglei tan thisen unit 20 an pe bawk.

Bána Kaih sawiho

Nimin khan Champhai bawrhsap Mohammad Aaquib hoin DC Conference Hall-ah Bána Kaih (Handholding) scheme hnuaia hmalaknate thlir let a ni. Bána Kaih Phase-I hnuaia department-in loan la thei tura a thlante bank-in loan an pek dan leh bank-in loan a pek theih tâk lohte chungchang te, Phase-II atana hmalakna turte leh Entrepreneurship Development Programme training rang zawka pek theih dan turte sawiho a ni.

I kawtkaiah sorkar

Lunglei DC Office buatsaih 'I kawtkaiah sorkar' (Prashasan Gaon Ki Ore) thawh hnihna chu nimin khan Haulawng leh a chhehvel khaw mipui tan Haulawnga Hausiampa Hall-ah buatsaih a ni. DC, DCSO, Social Welfare, Health, AH&Vety, Horticulture, Lunglei BDO leh Mizoram Rural Bank ten stall an siam a; mipuiin an mamawhte a remchan angin an lo tihsak a ni.