Science Drama Competition buatsaih a ni

State Council of Educational Research and Training (SCERT) leh National Council of Science Museum chuan nimin khan Chanmari YMA Hall-ah state level Science Drama Competition vawi 9-na an buatsaih a, St Paul's Higher Secondary School pakhatna an ni.

Science Drama Competition-a tel tur hian dfistrict pangaah lemchan thawnthu (script) thehlut tura sàwm niin, script lut aṭangin sikul pathum Shemford HSS, Zotlang, Aizawl, St Paul’s HSS leh Presbyterian English School, Champhai Zotlang te intihsiaknaa tel tura thlan an ni a; thupui chu ‘Science & Technology for the benefit of Mankind’ tih a ni.

Intihsiakah hian St Paul's HSS an ni a, pahnihna chu Shemford HSS niin, Champhai Zotlang PES chu pathumna an ni. Best script writer atan David Thang Nuntluanga Guite, St Paul’s HSS thlan a ni a, best actor atan RJ Lalpekhlua, St Paul’s HSS thlan a ni.

St Paul’s HSS hi November 21, 2025-a Regional Science Drama Competition-ah Mizoram aiawhin an tel dawn a; regional level-a ti ṭha pahnih chu January 2026-a Kolkata-a National Science Drama Festival-ah an tel leh ang.

Science Drama Competition kharna inkhawmah SCERT director Caroline Zoramthangi chuan, science leh technology chu hman sual theih a nih laiin, ṭangkai taka hman a nih chuan ram hmasawnna kengtu lian tak a nih thu a sawi a, "NEP 2020-in a ngaih pawimawh em em science temper, creativity, critical thinking leh experiential learning te chu science drama competition hmang hian tarlan a ni," a ti.

Kum 2009 aṭang khan Mizoramah Science Drama Competition buatsaih a ni.