ACON Lamp Lighting & Oath Taking

Aizawl College of Nursing (ACON) chuan nimin khan AICS Chapel-ah Lamp Lighting & Oath Taking Ceremony an hmang a, Mizoram University-a College Development Council director Prof. Lalbiakdiki Hnamte khuallian niin, Health Services joint director (Nursing) Lalchhanhimi khualzahawm a ni.

ACON hi hian kum 2024 khan BSc (Nursing) zirna ṭan a ni a, MZU-a inziak lut, Mizoram Nursing Council pawmpui a ni. Lamp lighting-ah hian Nursing joint director hlui Lalbiaksangi hoin zirlaite'n bati an chhi a ni.

Prof. Lalbiakdiki chuan nurse zirlaite fuihna thu sawiin, "Mihring thâwk lak hmasak berna bula awm chu nurse an ni a, an thâwk tawp laia an bula awm pawh nurse bawk an ni," a ti a, nurse zir mekte chu ṭawngkam leh nunze nêm nei turin a chah.