Mizorama health centre 530-ah nizung hmanga kawlphetha siamna bun kim a ni

Mizoram National Health Mission (NHM) leh SELCO Foundation chuan nimin khan Secretariat conference hall-ah 'Felicitation of SELCO Foundation' hun an hmang. Mizorama health centre 530-ah nizung chakna hmanga kawlphetha siam chhuahna khawl bun kim a nih thu tarlan a ni.

Tarlan danin, SELCO Foundation hian Mizorama sub-centre/health & wellness centre 379, primary health centre 69 leh health clinic 82, a vaiin health centre 530-ah solar power system dah a ni. Directorate of Health Services (DHS)-a Walk-in Vaccine Cold Storage bun thar chu Health & Family Welfare department kutah hlan a ni bawk.

Inkhawm hmanpuitu Planning secretary Lalmalsawma Pachuau chuan, sorkar hotute leh SELCO Foundation zarah Mizoramah mellung pawimawh tak phun a nih thu a sawi a, "Hmarchhak state zinga state puma health centre-te solar power hmanga thuam kim hmasa ber kan ni thei hi a lawmawm. Sik leh sa inthlak danglamah pawh health centre-te'n harsatna an tawh ṭhin a sutkian ngei ka beisei," a ti.

NHM mission director Dr Lily Chhakchhuak chuan, nizung chakna hmanga kawlphetha siam chuan hriselna lama thawktute hna a tichak dawn tih sawiin, "Vantlang mipui, hmun kilkhawr zawka awmte'n hriselna lamah ṭangkai takin an hmang thei dawn," a ti a, a lawmawm a tih thu a sawi.

SELCO Foundation chief executive officer Dr Harish Hande pawhin thu sawiin, Health department nena thawhhona ṭha tak an neih avangin a lawm thu a sawi a; "He hmalaknaah hian DHS-ah Walk-in Cold Storage bun tel niin, hei hi hmarchhak state-a '5 Metric Tonne Dual-Chamber Solar Powered Unit' hmasa ber a ni a, hri danna leh damdawi dangte dahṭhatna tura siam a ni," a ti.