PM Shri School tan rimawi hmanrua sem

Samagra Shiksha chuan nimin khan PM Shri sikulte hnenah rimawi hmanrua (musical instrument) an sem a, Education minister Dr Vanlalthlana’n a hmanpui.

Rimawi hmanrua semna inkhawm hi MacDonald Hill-a School Education conference hall-ah buatsaih a ni a; PM Shri sikul 35 hnenah ṭingṭang 368 leh keyboard 202 sem a ni. PM Shri school-te hian an dawn tam dan a inang lo a, zirlai an neih tam dan azirin pek a ni. PM Shri sikula music instructor-te tan zirlaibu pek nghal a ni bawk.

Minister Dr Vanlal-thlana chuan, PM Shri sikula zirlaite'n lehkha an zir piah lamah rimawi tum theihna remchang an nei tur chu a lawmpui thu sawiin, hmanruate chu zirlaite'n an thluak tihchak nan hmang ngei se a duh thu a sawi a; rimawi hmanrua an dawnte chu hman loha dah mai lo a, hmang ṭangkai ngei turin sikul hotute a chah.

Rimawi hmanrua semna inkhawmah hian School Education director Angela Zothanpuii leh SCERT director Caroline Zoramthangi te pawhin thu an sawi a; Samagra Shikha aṭangin Lalliansanga'n report pein, rimawi hmanrua sem chu Government e-Marketplace kaltlanga lei a nih thu a sawi.

Lalliansanga sawi danin, PM Shri sikulte hnena rimawi hmanrua pek dan chu - Aizawl district-ah sikul paruk, Kolasib district-ah sikul panga, Lunglei district-ah sikul pali, Siaha, Champhai leh Lawngtlai district-ah sikul pathum ṭheuh, Saitual leh Serchhip district-ah district-ah sikul pahnih ve ve leh, Hnahthial leh Khawzawl district-ah sikul pakhat ve ve a ni. Mamit district-a sikulte chu Dampa by-election zawhah pek a ni ang.