Mi tin dikna chanvo humhalh nan media hman ṭangkai a ṭul - HC Judge

Gauhati High Court judge Justice Michael Zothankhuma chuan, sorkar hnathawk tan ṭha taka hna thawh nan dan hriat a pawimawh thu leh, mi tin dikna chanvo humhalh nan media hman ṭangkai a ṭul thu a sawi.

Mizoram State Legal Services Authority leh Administrative Training Institute ṭang dun chuan nimin khan ATI Auditorium-ah sorkar hnathawkte pualin an tana dan pawimawhte inzirtirna an buatsaih a; Gauhati High Court judge pahnih - Justice Michael Zothankhuma leh Justice Yarenjungla Longkumer ten an hmanpui.

Justice Michael Zothankhuma chuan, ṭha taka hnathawh nan dan hriat a pawimawh thu a sawi a; IPC chu BNS-in a thlak tawh tih sawiin, "Dan bawhchhiate hrem leh tuartir ngawr ngawr ni tawh loin, mipui vantlang tana service ṭha pekna atan hman a ni tawh. Thiamna sang zelah court thurem dan pawh a danglam zel a, court-a inkhinna pawh court chhungah kher ni lo, online hmangte pawha tih theih a ni," a ti.

Media chak tak karah thusawi leh thil tihah fimkhur a ṭul thu sawiin Justice Michael Zothankhuma chuan, "Media hi mi tin dikna chanvo humhalh nan hman ṭangkai a ṭul. Dan bawhchhiate hrem loha an chhuak leh mai ṭhin hi sorkar hnathawkte’n tih tur an hlen chhuah tawk loh vang a ni thei," a ti a, ṭan la turin kalkhawmte a chah.

Justice Yarenjungla Longkumer pawhin thu sawiin, "Fundamental Rights kan neih laiin kan tih ve tur Fundamental Duties kan nei tel a, Fundamental Duties hriatnaah ṭan lak a ṭul hle. Mi dik lote hremna kawngah dan leh hrai, service matter, inhremna dan leh conduct rules hriat chian a ṭul a, sorkar hnathawkte'n ṭan in lak a ngai," a ti.

Special Awareness Campaign on Legal Provisions and Matters for Govt. Officials of Mizoram-ah hian Mizoram sorkar hnathawk mi 100 chuang an tel. Awareness campaign hi district tinah neih tum a ni.