Leivûng paihna siam hma chu leivûng chhuaha hna thawk rih lo turin hriattir

Mizoram State Project Monitoring Committee (MSPMC) chuan Aizawl tlak lama kawngpui, western side by-pass road siamtu RG Buildwell Engineer chu leivûng chhêk khawlna/paihna (spoil bank) siam a nih hma chuan leivûng chhuah zawnga hna thawk rih lo turin an hriattir.

MSPMC hi vice chairman R Lal Rinawma kaihhruaiin nimin khan Planning committee room-ah an ṭhukhawm a, Aizawl western side by-pass road laih hna thawh chungchang sawiho a ni a; contractor RG Buildwell Engineer leh project implementing unit PWD hotute'n an hmalaknate an tarlang.

Ṭhutkhawmah hian kawng laih hna thawh vanga leivûngin lui leh nungchate tana pawi a khawih theihna tur laka inven dan turte sawiho a ni a; leivung chhêk khawlna siam a nih hma chuan leivûng chhuah zawnga hma la tawh rih lo turin contractor an hriattir a ni.

Contractor chu danin a phût anga phalna neih ngai zawng zawngte November 2025 chhunga nei vek tur te, target/milestone fel tak siam a, chumi anga kal turin Resource Based Work Programme siam nghal tur leh ruahmanna siam chu zâwm ngei turtein an hrilh bawk.