KHAWTHLIR

Thlai hriak nei zirho

Agriculture & Farmers Welfare department chuan nimin khan Lungleia Agriculture conference hall-ah National Mission on Edible Oil - Oil Seeds/Tree Borne Oilseeds Scheme hnuaia tung leh thlai hriak nei chungchang zirhona an buatsaih. Lunglei district-a khaw hrang hrang aṭangin kut hnathawktu mi 40 an tel.

Nu leh pate zirtir

Khawzawl SP, District Child Protection Unit leh Khawzawl Vengthar Presbyterian English School ṭangho chuan nimin khan Khawzawl Vengthar YMA Hall-ah zirlai nu leh pate pualin digital literacy leh cyber security chungchang inzirtirna an buatsaih. Nu leh pate chu dan hnuaia naupangte hamṭhatna te, venhimnate leh chanvote hrilhfiah an ni.

MNF party-in chhuahtir an phût

MNF party chuan thuchhuah siamin, nimina Kolasib district-a kawngpui dan tumtu police-in an mante chu thu delhkilh awm loa a rang thei ang bera chhuah turin sorkar an phut tih an tarlang. MNF chuan, "Sorkarin fate lungawi lo chu tihlungawi tum aiin, a thuneihna changchawiin vau chi tinrengin a vau a, Police chakna hmangin an man khawm hi a pawi kan ti. An man khawmte harsatna leh phûtte hi a rang thei ang berin tihhlawhtlinsak se, a rang thei ang bera chhuah zalen kan phût. An thil phût tihlawhtling tura thlawp kawngah theihtawp chhuah kan inhuam reng a ni," an ti.

Agent-te kâwm

Dampa MLA by-election neih tura general observer MT Reju leh police observer Sabya Sachi Raman Mishra te chuan inthlan chuh tuma hming pe lutte agent-te October 22, Nilaini khan Mamit DC conference hall-ah an ṭhutkhawmpui. MT Reju chuan, inthlanna muanawm, felfai leh thianghlim a awm theih nan political party hrang hrangte an pawimawh tih sawiin, thianghlim taka campaign turin a chah. Sabya Sachi Raman Mishra chuan, inthlanna muanawm leh ralmuang a awm theih nan an thlithlai reng dawn thu a sawi bawk.