Operation Jericho chhungin END-in heroin kg. 3.889 leh meth kg. 53.008 an man tawh

Excise & Narcotics department (END) chuan September 1, 2025 aṭanga ruihhlo do beihpui thlakna, Operation Jericho kalpui a nih hnuah heroin kg. 3.889 leh methamphatamine kg. 53.008 an man tawh a; October 22, Nilaini pawh khan tlai dar 4-ah Bawngkawn South-ah methamphetamine kg 6.928 an man.

END chuan Nilaini tlaia Bawngkawn South-a meth an manah hian a neitua puh mi pali - Ramhlupuia (18) s/o Vanlalmanga, Lalramnghaka (43) s/o Robiaka leh Lalbiaktluanga (32) s/o Lalnunmawia, Hmunhmelṭha nia inchhalte leh Hming-thanzami (45) d/o Nodumthanga, Bawngkawn South nia inchhalte an man. NDPS Act, 1985 tlawhchhanin thubuai an ziak lut a, nimin khan court-ah an hruai a ni.

Mizoram sorkar leh Central YMA thawk dun chuan September 1, 2025 aṭang khan Mizoram pumah ruihhlo do beihpui an thlak a; Operation Jericho-ah hian state pawn aṭanga ruihhlo rawn lut tur dan chah tumin beihpui thlak a ni. Mizoram Police, Excise & Narcotics Department leh CYMA ten theihtawpin hma an mek a, ruihhlo tam tham tak man a ni tawh.

September 1, 2025-a Operation Jericho ṭan a nih aṭangin END chuan heroin kg 3.889 leh methamphatamine kg 53.008 an man tawh a; ganja kg 28.779, khuh damdawi (cough syrup) phial 1,100, alprazolam mûm 1,524 leh nitra-zepam mûm 2,234 an man tawh bawk.