Mizorama police station ṭha bera thlan Thenzawl PS-ah counselling neihpui ṭhin

Kum 2018 chhunga Mizorama police station ṭha ber atan Thenzawl Police Station thlan a ni a; Thenzawl PS-ah hian police-in mi an mante chu Pathian thu hrilhna hun (counselling) hmanpui ṭhin an ni.

Thenzawl PS-ah hian nikum khan January aṭanga December thla tàwp lam thleng khan thubuai ziah luh zat chu 24 a ni a, chu'ng zinga 22 chu chargesheet thehluh tawh niin, thubuai case pahnihah erawh chuan Forensic report nghah rih a ni thung.

Thenzawl Police Station-ah hian thawktu MRP 11 leh MAP pariat an awm a; thubuai ziah luh an khawih rei loh ber chu darkar 24 ral hmain an chingfel thei a, an khawih rei ber erawh chu thla thum chhungin an zo thei a ni. Thenzawl PS officer in-charge John Malsawmtluanga chuan, thawktute inpekna avang leh khawtlang hruaitu, a bikin YMA-te nen kan ṭan rual ṭhat avangin case lut reng reng rang taka an chinfel theih thu a sawi a, "Kan naute duty hun bituk pèl ṭhaka an duty cháng pawhin an phunnawi mai lo a, khawtlang ṭhatna tur nia an ngaih avangin phur takin, overtime-a an duty 

ṭhin hian min tilawm thei hle a ni," a ti.

John Malsawmtluanga chuan, mi an man ṭhenkhat zinga family case-a an mante chu police, kohhran lama inhmang tak takte'n an hma hun ngaihtuah reng chungin Pathian thu an hrilh ṭhin tih sawiin, "An ṭhatpui ve niin kan hria a, vawiin thlengin man nawn leh ngai lo tam tak an awm tawh a, ṭhenkhat phei chu khawlai lên vêlnaa inhmuh nikhua pawhin min tihlim ṭhin em em a ni," a ti a; counselling chu an ṭhat phah hlea an hriat thu a sawi.