Lungawi lohna kan lantir kha politics-a inpuhmawhna a ni lo - Commercial Vehicle JAC

Mizoram Tipper Association (Driver's & Owner's) Kolasib District Headquarters hnuaia Commercial Vehicle Joint Action Committee hruaitute chuan, Jandu Construction-in November 1, 2025 aṭangin kawng siam ṭan tura an insawi chu an rin loh avangin lungawi lohna an lantir niin an sawi a; lungawi lohna an lantir chu politics-a inpuhmawhna a ni lo niin an sawi bawk.

Commercial Vehicle JAC leh leh Silchar Truck Drivers' Association hruaitute chuan nimin khan Kolasib Press Club-ah thuthar thehdarhtute an kâwm a; NHIDCL leh an hnuaia contractor-te chuan an insawi angin hna an thawk ṭhin lo tih sawiin, Jandu Construction-in November 1, 2025 aṭangin kawng an siam ṭan tur thu an sawi pawh an rin thlâwt loh thu an sawi.

JAC secretary F Rotluanga chuan, NHIDCL leh an hnuaia contractor-te'n hna thawh ṭan hun tur leh an zawh hun tur an sawite chu an hre reng dawn tih sawiin, "An intiamna an tihhlawhtlin ngei kan beisei a, an sawi anga an awm leh awm loh kan enzui reng dawn. November thlaah Bairabi-Kolasib, Vairengte-Sairang leh PWD hnuaia awm Serkhan-Bagha kawngte kan endik dawn a, kan duhkhawp hmalakna a awm loh chuan kan thiam angin hma kan la chhunzawm ve dawn," a ti.

October 23, Ningani-ah kawngpui dan an tum vanga police-in an man 25-te chu chhungkuaa eizawngtu ber an nih thu sawiin JAC hruaitute chuan, "An hma hun an ngaihtuah lo thei lo. Kan thawhpuite lock-up hial an lut. SP leh official dangte'n zan dar 7 hmaa road block an call-off loh chuan NH Act, 1956 Section 86 leh Essential Commodities Act, 1955 an awrh dawn tih min hrilh a, heng case-te hi bail theih loh a ni a, kan mi leh sa 25-te khan awrh ta se, an tan dinchhuah leh ngaihna a awm dawn lo," a ti a; kawngpui dan an tih chu an tihtawp tak thu an sawi.

Silchar Truck Drivers' Association president Shipu Lasker chuan, Vairengte-Sairang kawng chhia chu an tawrh nasat thu sawiin, "Kawng chhe laiah harsatna a awmin Mizo driver-te'n kut min thlak fo a, mahse, kan inngaidam leh mai ṭhin. Kut kan tawrh chhan chu kawng chhia vang a ni," a ti a; Mizorama an luh rualin gate hrang hrangah pawisa an chawi bakah, police uniform hate'n pawisa an dil ṭhin thu a sawi.