Dan loa khaw dinte 2025 chhung ngeia tihtawp turin MSU-in sorkar an ngen

Mizo Students’ Union (MSU) chuan, Mizorama dan loa khaw din awm mekte kumin chhung ngeia tihtawp a nih theih nana hma la turin Mizoram sorkar an ngen a; sorkarin college-a zirtirtu tur assistant professor 31 a la tur chu lawmawm an tih thu an tarlang.

MSU hian nimin khan Aizawl Press Club-ah thuthar thehdarhtute an kâwm a; an president B Lalkhawngaihzuala chuan, Mizoramah dan loa rawn pêm lutte'n an duhna hmunah inbâwk khawma khua an din ṭhin chu ṭha an tih loh thu a sawi a, "Kumin chhunga sorkar aṭanga hmalakna a awm lo emaw, dan loa khaw dina cheng mipuite hi an chhuak lo emaw a nih chuan MSU-in a thiam danin hma kan la ang," a ti.

MSU tarlan danin, RTI Act hmanga April 9, 2025-a an dilna chhan an nih danin, Mizoramah dan loa khaw din 11 a awm mek. An zir chian danin, dan loa khaw din zinga eng emaw zatah sorkar hmalakna (school, power supply, health, water Supply) a awm a ni.

Dan loa khaw dinah sorkarin hmasawnna hrang hrang a pek tawhte chu titawp vek turin MSU chuan sorkar an ngen a; dan loa khaw dina chengte chu kumin chhung ngeia inthiar fihlim turin an chah bawk.

B Lalkhawngaihzuala chuan, dan loa khaw dinah sorkarin sikul, kawlphetha, hriselna lam leh tui te a pe zel mai chu ṭha lo an tih thu sawiin, "MSU chuan dan loa khaw dinte tihtawp a nih theih nan kum 2013 aṭang khan hma nasa takin a lo la tawh ṭhin," a ti a, MSU hmalakna avangin dan loa khaw din Tuichawngchhuah chu tihtawp a nih tawh thu a sawi.

MSU President chuan, college assistant professor nghet (direct recruitment) kum 20 chuang a awm tawh loh hnua Mizoram sorkarin assistant professor 31 lak a tum mek chu lawmawm an tih thu a sawi a, "Mizo ṭhalaite'n kan lo nghahhlelh em em assistant professor hnaah hian a ram leilung fate ngei kan luh theih nan Mizo ni lote chu dil buai lo turin kan ngen," an ti.

College assistant professor lak turah hnam dang zingah application form thehlut tawh, short list-a tel an awm a nih chuan interview lo turin MSU chuan an ngen a; an ngenna anga interview hmachhawn lote chu form fill-up naa senso an pek theih thu leh, interview lui an awm a nih chuan an chhinchhiah dawn thu an tarlang.