Mizoram Solar Policy, 2025 tlangzarh

Power & Electricity minister F Rodingliana chuan October 23, Ningani khan a pisaah Mizoram Solar Policy 2025 a tlangzarh.

F Rodingliana chuan, kawlphethaa intodelh chu ZPM sorkar policy a nih angin solar power hmanga kawlphetha siam chhuah tihpun nan Solar Policy thar a pawimawh thu a sawi a, "He policy thar hian private entrepreneur leh private developer te tan solar power plant siam kawnga investment an tih theihna kawng zau tak a hawng a, mimal eizawnna kawng thar a hawnsak dawn," a ti.

Kawlphetha mamawh pung zel siam chhuahna vanga khawvel boruak bawlhhlawh tiziaawm turin Mizoram sorkar chuan Mizoram Solar Policy, 2025 a duang a; February 13, 2025 khan Council of Ministers-in an pawmpui hnuah, Mizoram sorkar chuan February 25 khan notification a tichhuak. Mizoram Solar Policy, 2025 hian Solar Power Policy of Mizoram, 2017 a luahlan a ni.

Mizoram Solar Policy, 2025 hian Mizoram chu sorkar investor-te tana sum invest châkawm a nih theihna tur hmuna siam te, India puma 100GWp siam tumnaa thawh hlawk tak state ni ve tura ṭan lak te, technology thar tihmasawntu ni tur leh solar power generation hmasawn zelna kawnga hma latu lian nih te, kum 2030-ah solar aṭanga 270MWp siam hman leh Mizoram power hman ral aṭanga 40% chu renewable energy hmanga siam chhuah te, renewable energy zinga 75% chu solar aṭanga siam chhuahte chu a tum langsar zual a ni.

Mizoram sorkar chuan mimal leh sorkar bakah, industry building chunga roof top solar project nasa taka kalpui turin ruahmanna a siam tawh a; PM Suryaghar hnuaiah Central-in subsidy a pek bak Mizoram sorkarin subsidy ṭha tak a pe a ni.

Rooftop solar project hnuaiah hian in neituin in chunga solar dahna tur capital investment a neih loh pawhin third party-in an dahsak thei a, third party leh in neihte'n inremna siamin, solar energy siam chhuah chu department-ah an thei. Kawlphetha hralh aṭanga hlâwkna chu in neitu leh third party ten an inremna azira an insem dawn a ni.