Kawnpui-Sairang kawng siam dan thehlut turin High Court-in a hriattir
Gauhati High Court chuan Kawnpui leh Sairang inkar national highway siamtu MSJ Infratech chu an hnathawh chin leh kawng an siam zawh theih hun tur October 31, 2025 hma ngeiin court-ah affidavit hmanga sawi turin a hriattir.
Thu dawn danin, Kawnpui leh Khamrang inkar NH kawngpui chhia chungchangah hian Mizoram Truck Driver Association (MTDA) chuan Gauhati High Court Aizawl Bench-ah public interest litigation (PIL) an thehlut a, chu chu judge pahnih ṭhutna High Court chuan nimin khan a ngaihtuah a ni.
MTDA PIL chung-changah hian Gauhati High Court chuan NH enkawltu NHIDCL-in kawng siam tura hna a pek MSJ Infratech chu thubuaiah hian a hnûk lut (implead) a; hna an thawh tawh chin leh kawng an siam zawh theih hun tur October 31, 2025 hma ngeiin Court-ah affidavit hmanga sawi ngei turin a hriattir a ni.
MSJ Infratech hian sawifiahna affidavit an thehluh loh chuan Court-ah NHIDCL hotute an inlan a ṭul thu a tarlang a; thubuai ngaihtuah leh hun atan November 6, 2025 a ruat bawk.