Mizorama FCI kudam 6-ah buhfai metric ton 20,573.45 a awm mek

Food Corporation of India (FCI) hotute chuan, Mizorama FCI kudam parukah buhfai metric ton 20,573.45 chhêk khawl thu a nih thu leh, Mizoram sorkar chu FCI hotute ILP exemption an pekna huang zauh tura an duh thu an sawi.

FCI Aizawl Division manager Bankim Phonglo chuan nimin khan FCI office, Tanhrilah thuthar thehdarhtute a kâwm a; Mizoramah FCI chuan buhfai MT 31,842 lenna kudam paruk an neih thu sawiin, "Sairangah MT 10,000 lenna tur kudam kan sa mek a, December 2025 velah peih hman kan beisei. Kudam paruk - Bairabi, Kolasib, Bualpui, Aizawl, Lunglei leh Lawngtlaiahte Bairabi-a rêlin a rawn phurh luhte aṭangin buhfai phurh kual ṭhin a ni a, Sairanga kudam peih a nih hunah Sairang aṭangin Aizawl, Lunglei leh Lawngtlaia FCI kudamahte buhfai sem kual a ni tawh ang," a ti.

Bankim Phonglo chuan, Mizorama FCI hotute leh Regional Office, Shillong hotute tan Mizoram sorkarin ILP ngaihhnathiamna (exemption) an pek avanga an lawm thu a sawi a; hmun hrang hranga FCI official-te tan pawh ngaihhnathiamna pek ni se an duh thu sawiin, "A bikin Mizoram nena innghêng reng Regional Office, Guwahati leh FCI Headquarters, Delhi lama kan hotute hi thil pawimawha Mizorama an rawn kal dawnin ILP an dil zel a ngai a, a buaithlak châng a awm ṭhin," an ti a, Mizoram sorkarin exemption pe ve se an duh thu a sawi.

FCI hotute sawi danin, tunah hian Mizoramah Open Market Sale Scheme-Domestic (OMSS-D) kalpuitu mimal/pawl pali an awm a; October 23, Ningani dinhmun angin Mizorama FCI kudam parukah buhfai MT 20,573.45 leh wheat MT 1,810.24 a awm mek a ni.