Champhaiah meizial man sa tihchhiat a ni

July 2024 leh September 2025 inkara ram dang aṭanga dan loa meizial lak luh, Champhaia Legal Metrology enforcement-te'n an mante chu Controller of Legal Metrology thupek leh District Magistrate hriatpuinain Legal Metrology pisa tualah tihchhiat a ni.

Foreign cigarette dan loa lak luh man khawm, nimina Champhaia tihchhiatte hi brand hrang hrang báwm (packet) 1,50,000 a ni a; tualchhunga hralhna ang chuan cheng nuai 150 mana chhût a ni.

Meizial tihchhiat puala inkhawm tawi buatsaihah Champhai bawrhsap Mohammad Aaquib chuan, dan loa meizial lak luh leh zawrh mante tihral a ni chu ṭha a tih thu sawiin, "Mipui zirtirna leh dan loa thil tih donaah rah ṭha a chhuah ngei ka beisei," a ti a; Legal Metrology thawhpuitu Assam Rifles, Police leh District Anti-Tobacco Squad te ṭhahnemngaihna fakawm a tih thu a sawi.

Champhai Bawrhsap chuan, chhiah chawi loa dan loa ram dang aṭanga meizial lak luhin ram sum leh pai dinhmunah a nghawng nasat thu sawiin, "Vantlang hmun pawimawh, zirna-in leh a chhehvelah meizial zûk leh zawrh khap tlat a ni. Dan loa hmalakna leh ruihhlo khawih ṭhat lohzia inzirtirnaah ṭan lak lehzual a ṭul," a ti.

Legal Metrology assistant controller V Lalfakzuala sawi danin, Legal Metrology, Champhai chuan Legal Metrology (Packaged Commodities) Rules 2011 Rule 6 leh The Legal Metrology Act, 2009 Section 18 hnuaiah dan loa ram dang aṭanga foreign cigarette lak luhte an man ṭhin a ni.