Education Minister-in sikul a tlawh

School Education minister Dr Vanlalthlana'n chuan nimin khan Comprehensive Model School a tlawh a, skill laboratory tur buatsaih mek a enfiah.

Education Minister hian zirlaite hmaah thu sawiin, Model School chu a luh tawhna sikul a nih thu sawiin, "He sikul aṭang hian minister hial ka ni thei a ni," a ti a; rilru puthmang dik leh hrisel neih a pawimawh thu sawiin, an tum tisang turin zirlaite a chah.

Skill laboratory din mek chu mi dang pawhin an la pan tur thu sawiin Dr Vanlalthlana chuan, theihtawpa ṭan la tur leh classroom-a zirtir mai bakah, hun leh thâ pe tam turin thawktute a fuih a; sorkar sikulte tihchangtlun zel tum a nih thu te, zirlaite enkawlnaah vawi leh khata zuang thut loa hmasawn deuh deuh a ṭul thu te, sorkar sikula naupang lut an pung zel theihna tura ṭan lak a ṭul thute a sawi.

School Education director Angela Zothanpuii chuan, Comprehensive Model School-ah Bharat Force-in skill laboratory an din dan tur sawifiahin, tun hmaa Atal Tinkering aia changkang zawk a nih tur thu a sawi a, "India hmarchhaka a hmasa ber a ni dawn a, school level atan chuan a changkang ber tur a ni a, sikul danga naupangte pawhin an tlawh leh chhim theih tur a ni," a ti.

Education Minister-in Comprehensive Model School a tlawhnaah hian Samagra Shiksha state project director C Lalthanzira'n thu a sawi bawk.