TH Lewin (Thangliana) tute rawn zin

Sap sipai zinga Mizorama rawn lut hmasa Thomas Herbert Lewin (Thangliana) tuchhuante chuan Mizoram an rawn tlawh a, October 24, 2025 zan khan Lungleia INTACH hruaitute nen an inkâwm.

Thangliana tuchhuan rawn zinte hi Anne Taylor leh a fanu Harriet Taylor bakah, Joe Salf te an a, London aṭanga rawn kal an ni. Anne Taylor chuan, Mizorama an rawn kal chhan chu, an pu TH Lewin chêttlatna hnuhma tlawh a, a mi chengte awm dan leh hmasawnna hmuh duh vang a nih thu a sawi a, "Kan pu Thangliana'n a ram awpte a ngainatzia leh a hmangaihzia hi keini a tuchhuante pawhin kan hria a, kan tuipui a ni," a ti.

Anne Taylor hian thlalak hlui eng emaw zat a rawn keng a, Khumi nula te, Sendus Lakher te, Pawih lal te Thangluah lal te, Thangliana bangla te a tel.

Lunglei INTACH hruaitute nen an inkawmnaah hian convener Rev. Dr F Sangvela'n ngaihhruina thilpek a hlan. Thangliana tuchhuante hian a hmain Aizawlah an chanchin ziaktu Lalhruaitluanga Ralte leh mi dangte an kâwm tawh bawk.