Bank-te'n Bána Kaih Phase I-ah mi 220 hnenah loan an pe tawh

Mizoram sorkar flagship programme Bána Kaih (Handholding) Scheme Phase-I hnuaiah mi 220 hnenah bank-te'n loan cheng nuai 1,578.37 an pe tawh.

October 24, 2025 thleng khan Bána Kaih kalpuinaa sorkarin a thawhpui bank pathum - Mizoram Rural Bank, Mizoram Cooperative Apex Bank leh State Bank of India te chuan Bâna Kaih Phase-I hnuaia loan la tura thlan (progress partner) mi 702 zinga mi 220 hnenah loan an pe tawh a; loan pek tawh 220 zinga 80 chu Horticulture department hnuaia awm an ni.

Bána Kaih Phase-I hnuaia loan pe tam tawh ber MRB-in mi 169 an pe tawh a; SBI-in mi 41 leh Apex Bank-in mi 10 an pe tawh. Bank pathumin loan an pek tawh belhkhawm chu Rs 15,78,37,750 a ni.

Hetih lai hian, Bána Kaih Phase-I hnuaia loan hmu tura sorkarin a thlan tawh zinga progress partner 128-te loan dilna chu bank-te'n an hnawl.

Bána Kaih hnuaia loan dilna hnawlte chu bank-in criteria an neihte paltlang zo lo an ni a; CIBIL score ṭhat tawk loh vanga hnâwl an ni tlangpui. Loan dang rulh mek nei leh hmalakna behchhanna tur in hmun/lo/ram chungchang fel tawk lote chu a langsar zual a ni bawk.