KHAWTHLIR

Thisen pe

October 25, Inrinni khan kohhran ṭhalai pawl pathumin thisen an pe. Salvation Army Youth, Thingsulthliah CO bial chuan ZMCH tan unit 79 an pe a, petute mipa 65 leh hmeichhia 14 an ni. KṬP, College Veng Branch-in an din champha pualin Synod Hospital tan unit 31 pein, petute mipa 24 leh hmeichhia pasarih an ni a; ṬKP, Lunglei Bazar Veng Unit aṭangin Lunglei Civil Hospital tan mipa 24 leh hmeichhia pathumte'n unit 27 an pe bawk.

Ruihhlo do nan ṭawngṭai rual

Bethlehem Vengthlang Local Council kaihhruaiin Bethlehem Vengthlang mipui chuan an venga ruih theih thil ti leh zuarte'n an sim theih nan nimin tlai dar 5:00 - 5:30 chhung khan veng pum huapin chhung tinah ṭawngṭai rualna hun an buatsaih. He hun hi veng mipuiin an zawm ṭha thawkhat nia thu dawn a ni.

MLA-in hmanpui

Adviser to CM Dr Lorrain Lalpekliana Chinzah, Lawngtlai East bialtu MLA chuan October 25, Inrinni khan Central YLA Hall-ah Lai Women Association (LWA), Lawngtlai-III silver jubilee lawmna a hmanpui. Dr Lorrain Lalpekliana chuan, LWA chu hmeichhiate venghimtu, an zahawmna tungdingtu leh dâwmkangtu a nih thu a sawi a; chhungkaw keh chhe tur vengtu, nupui ṭha zawk nih theihna tura pawl ṭha ber leh pawimawh ber a nih theih nan ngaihtuahna sêng zel turin kalkhawmte a fuih.

Postal ballot

Mamit district election officer K Laltlawmlova chuan hriattirna tichhuakin, Dampa bial MLA by-election atana sorkar hnathawk, election duty tura ruat zinga Dampa bial chhunga vote nei, Dampa bial chhunga duty lo turte tan postal ballot hmanga vote an thlak theih nan Mamit RO office-ah Postal Ballot Facilitation Centre siam a nih thu a tarlang. November 3, 2025 zinga dar 9 aṭanga tlai dar 4 thleng vote thlak theih a nih thu a tarlang bawk.

YMA In hawng

Tlangnuam Branch YMA-in an veng thlanmuala mi chanhaite luah tura an sak YMA-in, hmeichhe pakhat luah ṭhin chu an sa ṭha a, October 25, Inrinni khan an branch vice president Zosangzuala'n a hawng. Tlangnuam YMA In hi kum 2009-ah sak a ni a, hmeichhe pakhatin a luah reng a, tun hnaiah sak ṭhat a ni. A sakna atan hian YMA sum leh an veng mite thawh khawm Rs 4,81,680 sen a ni.