Guwahati-a Mizote'n Guwahati-a zinte harsatna thlentu ni lo turin an ngen

Guwahati Mizo Welfare Association (GMWA) chuan thuchhuah siamin, Sairang leh Guwahati inkarah rêl a tlan hnuah Guwahati-ah Mizo zin an pun chhoh thu an tarlang a; Guwahati-a zin turte chu Mizo awm nghet leh hnathawh emaw, zirna emaw vanga awmte tana harsatna thlentu ni lo turin an ngen.

Guwahati chu hmarchhak state tinte kawtchhuah a nih avangin state hrang hrang aṭangin inbengbel an tam thu tarlangin GMWA chuan, "Ram neitute hi rilru zau leh hnam dangte hriatthiamna ngah tak an ni. Ramri lama buaina a chhuah cháng pawh hian Mizote nèkchêpin kan awm ngai lo. Khawpui ralmuang leh chenna nuam, hna thawhna leh zirna atan pawha chhenfakawm a ni tih hi Zoram mipuite'n min hriatpui se," an ti.

GMWA chuan, zu leh ruihhlo dang vanga buai a, kutbénga awmte police-in an man changin GMWA-in vawi tam tak an buaipui tawh tih tarlangin, "Zoram lamah kan thawn haw tawh ṭhin. Hetiang ti mite hian hnam hmêl an tibâl mai ni loin, he laia Mizo awmte tan harsatna leh buaina an thlen ṭhin avangin Guwahati-ah hian zu leh ruihhlo danga insûm thei lo, harsatna leh buaina thlen tur chu rawn tla lut lo turin kan ngen a ni," an ti a; dan loa sumdawnna Guwahati-ah buaipui lo turin Mizo mipui an chah.

Tute'n emaw hnathawh tur an sawihmuh vanga Guwahati-a rawn kal tum tan hna chu rintlak a nih leh nih loh chian hmasak a pawimawh thu sawiin GMWA chuan, "GMWA hruaitute biak hmasak a, finfiah zel tur a ni. Rêla zin mite tan rel chawlhhmun leh rel chhungah mi bumhmang an awm ṭhin tih hriain, hmelhriat ngai loh lakah fimkhur turin kan inchah a ni," an ti.

GMWA chuan, Guwahati-ah thlenna tur Mizoram House leh Mizo Khualbuk ṭha tak tak a awm thu sawiin, "Hengte hi Guwahati lo zin tur chuan hman ṭangkai ni se tih hi kan duhaisam a ni," an ti a; Guwahati-a harsatna tawk palh an awm chuan a rang thei ang bera GMWA hnena thlen turin mipui an ngen bawk.