Zokhua, Falkawnah Live Museum hawng

Art & Culture minister C Lalsawivunga chuan October 25, Inrinni khan Falkawna Zokhua (Mizo Typical Village)-ah Live Museum a hawng. Live Museum hi Art & Culture department buatsaih a ni a, bul ṭan nan November 15, 2025 thleng chawlhkar tin Inrinni apiangin mipui tlawh theiha hawn a ni dawn.

C Lalsawivunga chuan, Live Museum chu ṭhangtharte’n Mizo pi pute khawsak dan leh nunphung an hriat thar nan a ṭangkai hle dawn tih sawiin, "Tualchhung mite leh ṭhalaite tana sum lak luhna hnâr atan te, zin mite’n Mizo kutchhuak an hmuha an lei theih nan leh, Mizo nihna leh hnam zia an zir theih nan a pawimawh dawn a ni," a ti a; Live Museum chu tihchangtlun a nih chhoh zel a beisei thu leh ei leh in pawh Mizo taka buatsaih a nih dawn thu a sawi.

Live Museum hawnna inkhawm hi Art & Culture secretary Zodingpuii'n a kaihruai a; EFCC secretary Sudhir Kumar, IGP Seju P Kuruvilla leh PCCF Rajeev Kumar Tiwari te pawhin an hmanpui. Falkawn YMA, MHIP leh MUP aiawhte leh Lenkawl Cultural Club-te’n hmânlaia Mizo nunphung a takin an entir.

Falkawn Zokhuaa Live Museum Show bul ṭan nan November 15, 2025 thleng chawlhkar tin Inrinni apiangin mipui tlawh theiha hawn a ni dawn a, a ṭul dan azirin buatsaih chhunzawm tum a ni.

Local tourism-ah Mizoram mipui an harh thar zel avang leh Mizoram pawn aṭanga khualzin lo lut an pun belh zel avangin Art & Culture department chuan Live Museum hi Mizo hnam nunphung leh khawsak dan chawi lâr nan an buatsaih a ni a; Mizo nun ze mawi leh chin dan hrang hrangte a taka zirlaite'n an hmuh theihna tura tih a ni bawk.

LIVE MUSEUM @ ZOKHUA, FALKAWN
* November 15, 2025 thleng chawlhkar tin Inrinni apiangin hawn a ni dawn.
* Luh man Rs 100 a ni.
* Live Museum show hun hnihah ṭhen a ni a; first segment chhun dar 12:00 - 1:30 inkarah leh second segment chawhnu dar 2:00 - 3:30 inkarah neih ṭhin a ni ang.
* Tun hmaa Mizo nun dan hrang hrang, hnam lâm leh zai, Mizo infiamna, Mizo chaw leh thil dangte entir ṭhin a ni dawn.