Save Tuichhuahen Project hnatlangpui

Kolasib College zirlai leh zirtirtute chuan October 24, 2025 khan Kolasib khawpui tui tlan, Tuichhuahen vawn fai nan 'Save Tuichhuahen Project' hnuaiah hnatlangpui an nei. Hnatlangah hian zirlai leh zirtirtu 200 chuang an thawk chhuak a, bawlhhlawh tam tham tak chhar khawmin, UDPA department lirthei hmangin bawlhhlawh paihna hmunah an paih a ni.

Kolasib College principal Lalṭanpuia Rengsi chuan, an college-in project an kalpui mek chu Kolasib mipuite'n an thlawp a pawimawh thu a sawi a, "Luikawra bawlhhlawh kan paih mai hian kan tui tlan a tibawlhhlawh a, tun aṭanga hma kan lak loh chuan rei lo teah kan tui tlan hi duh khawp lak tur awm lo khawpin a bawlhhlawh ang tih a hlauhawm," a ti a; a paihna hmun dik taka bawlhhlawh paih ṭhin turin mi tin a ngen.