Biometric enrolment-in Lawngtlai dist-ah Myanmar raltlan 2,195 chhinchhiah tawh

Ram dang aṭanga Mizorama sahimna zawnga rawn raltlante chhinchhiahna, biometric enrolment mekah Lawngtlai district-ah chuan raltlan 2,195 chhinchhiah a ni tawh.

October 24, 2025 khan Lawngtlai bawrhsap Donny Lalruatsanga hoin Lawngtlai District Commitee on Myanmar Refugees an ṭhukhawm a; he hunah hian Lawngtlai district-ah Myanmar aṭanga raltlan 2,195 chu biometric enrolment tihsak a ni tawh tih tarlan a ni.

Ṭhutkhawmah hian raltlante dik taka chhinchhiah an nih theih nan sorkar, VC leh pawlte inkarah thawhhona ṭha awm zel tura hmalak an rel a, raltlante chu Zo hnahthlak an ni tih pawm tlangin, kawng hrang hranga ṭanpui chhunzawm ni se, an ti. Rakhine, Myanmar aṭanga sumdawng rawn lutte chu uluk zawka endik ṭhin an rêl a; raltlante'n an hman ber two wheeler khuahkhirhna ṭha zawk siam ni se an ti bawk.

Lawngtlai DC chuan, Lawngtlai district-a biometric enrolment tihna khawl pali zinga pahnih chauh a hman theih a nih mek thu te, khawlte chu Home department-ah thleng tawh a ni a, khawl dang chah mek a nih thu leh, internet ṭhat loh vanga khawl hman theih lohna hmun a awm thu a, chu chuan harsatna a thlen thu a sawi.

Ministry of Home Affairs thu angin biometrict enrolment neih hnuah chauh raltlante hnenah identity card pek chhuah tur a nih thu sawiin Bawrhsap chuan, "ID card pe chhuak turin chak taka hmalak a ni a, VC-te'n mahni huam chhunga raltlante dik takin chhinchhiah ula, humhim bik an awm tur a ni lo," a ti.