Aizawlah 'Khuado Pawi' hmang

Zomi Cultural Society, Mizoram leh Zomi Cultural Society, Aizawl Joint Committee chuan October 25, Inrinni khan Bawngkawn South YMA Hall-ah 'Khuado Pawi' an hmang a, minister PC Vanlalruata’n a hmanpui.

Khuado Pawi (Kût) hmannaah hian an member zinga hlawhtling thar mi 14, pensioner pakhat leh professor ni thar mi pakhat hnenah chawimawina hlan a ni a; hnam lâm leh zaite entir a ni.

Khuallian PC Vanlalruata chuan, Mizoram chu Zo fate Jerusalem a nih avangin chhak, thlan, chhim leh hmar aṭangin mi hrang hrang an chenho thu sawiin, Mizoram malsawmna tura ṭanghopuiah a sawm a, "Mizoram sorkar chuan Zo fate hmasawnna tur ngaihtuahin theihtawp a chhuah a, kan vaia kan thlawp a pawimawh. Ṭawng chi hrang hrang kan hmang a, heng kan ṭawng hrang hrang te, culture leh kût te hi ṭha takin humhalh zel ila, kan ṭawng hrang hrangte hi inhriatsakin inhumhalhsak tawn zel ang u," a ti.