Mat phaiah sazu hrâi beihpui thlak

Serchhip District Agriculture Office leh Serchhip Joint Village Council chuan ṭhingtàm vanga sazu puangin buh leh thlai a seh chhiat tur ven nan October 24, 2025 khan Serchhip Mat phaia zaù hrang hrangah sazu hrai beihpui an thlak a; sazu tûr hman dan, sazu hrai dan leh sawngbawl dante loneitute an zirtir.

Sazu puang hrai beihpui thlakna hi Serchhip Mat phaia zaù hrang hrang - Zawlpui, Chawm, Chamdur, Thliarpui, Lumtui, Tuichar, Zuangleng, Zehtet, Thuhruk, Lungbu, Luitedam, Tuisen leh Lathei-ah te neih a ni. Loneitute chu sazu tûr hman dan, sazu hrai dan leh sazu túr sawngbawl dante an zirtir a; a ruala sazu hrai a nih theih nan loneitute hnenah DAO chuan sazu tûr siam sa a sem nghal.

Tûr hmanga sazu hrai hlumte chu senghawia phûm vek tura ruahman a ni a; sazu sa zuar leh ei ṭhinte chu fimkhur turin an chah bawk.

Serchhip DAO Lalchharliana chuan, tunkar chho hian sazu hrai dinhmun leh sazuin loneitu a tihbuaite dinhmun hriatchianna tura report form an thawn darh chu an dawnkhawm a beisei thu sawiin, loneituten harsatna an tawh loh nan theihtawp an chhuah thu a sawi.