Sorkar laipui aiawh hoin pawisa tihthih avanga harsatna sawiho

Pawisa note tihthih a nih vanga Mizoram dinhmun zir chiang turin sorkar laipui chuan Ministry of Agriculture-a additional secretary Jalaj Shrivastava a rawn tír. Sorkar laipui palai hian nimin khan State Guest House-ah Mizoram sorkar official-te leh tlawmngai pawl aiawhte a kâwm.

Meeting-ah hian Jalaj Shrivastava chuan, thingtlang mite'n pawisa awlsam zawka an lak chhuaha an dah luh theih nan hma la turin Mizoram sorkar a hriattir a; Mizoram sorkar aiawha meeting-a tel Transport secretary Dr Franklin Laltinkhuma chuan, Chief Secretary hnenah a thlen tur thu a sawi.

Dr Franklin Laltinkhuma chuan, All Mizoram Farmers Union (AMFU) hruaitute chu pawisa note tihthih tawhte hman theih a la nih tho avangin dawng hreh lo tura thingtlang lo neitute hriattir turin a hrilh.

Mizoram Merchant Association (MIMA) hruaitute chuan, Krismas a hnai tawh tih sawiin, Krismas chu kohhran hrang hrangin sum tam tak sênga an lawm ṭhin thu an sawi a, "Pawisa thih vang hian engtin nge kuminah kan hman dawn tih hriat theih a ni lo," an ti.

Pawisa tihthih vangin sumdawngte'n harsatna an tawh thu sawiin MIMA hruaitute chuan, "Mizoramah thil siam chhuah kan neih loh avangin state dang aṭangin bungrua kan la lut ṭhin a, kuminah chuan pawisa thih vangin zin chhuak thei an tlem a, a zin chhunte pawhin sum tlemtê bâk ken tur an nei lo," an ti a; thingtlang aṭanga thawmhnaw la chhawng tur pawh kuminah chuan an awm meuh loh thu an sawi.

MIMA hruaitute chuan, Mizoramin Rs. 100 leh Rs. 50 note a mamawh belh thu sawiin, "Bank-a pawisa dah luh theih hun pawh Krismas nen a inhnaih lutuk avangin, pawhsei ngei ni se kan duh," an ti.

Gas distributor leh petrol pump neitute chuan, Rs. 500 leh Rs. 1,000 dawn theih tur an tih hun chhung chu November 24 thleng ni mah se, mipui mamawhna vangin dah luh theih hun December 30 thleng dawn an tum thu an sawi a; hun tiam aia rei pawisa note tihthih an dawn dáwn avangin sorkar laipuiah harsatna an tawh loh an beisei thu Jalaj Shrivastava chu an hrilh.

Meeting-ah hian Mizoramin buaina leh harsatna a tawh tawh leh hun lo la kal tura harsatna a tawh theih tur te, hmalak dan tur leh a theih ang china sutkian dan turte sawiho a ni a; meeting-a thurêl leh rawtnate chu Jalaj Shrivastava chuan sorkar laipuiah a thlen dawn a ni.

Hetihlai hian, Mizoramah pawisa tih thih avanga harsatnain ziaawm lam a pan zel a, bank dawrtu pawh an a ni telin an tlem a ni. ATM engemawzatah Rs. 100 note dah a ni a, ATM ṭhenkhatah chuan intlar pawh an tam vak tawh lo.