CM leh Power hotu an inkawm

North Eastern Regional Power Committee director Brieflee Lyngkhoi leh chief minister Lal Thanhawla-te chu nimin khan CM pisaah an inkâwm.

Hawla hian Bongaigaon Thermal Power Plant hmang ṭangkai tur hmarchhak state-a chief minister-te'n a ruala Ministry of Power hnena he Power Plant aṭanga kawlphetha siam chhuah tura a man bituk sang chu power subsidy hmanga tihniam tura ngenna lehkha an siamah hming a ziak a, Brieflee Lyngkhoi chu a pe nghal a ni.

Brieflee Lyngkhoi hian Bongaigaon Thermal Power Plant chu kawlphetha megawatt 750 pe chhuak thei tura duan a nih tawh thu te, megawatt 250 chu hawn (commission) a nih tawh thu te, megawatt 250 dang chu kumin tawp lama hawn beisei a nih thute leh, megawatt 250 dang leh chu kum 2017 laihawl vela hawn beisei a nih thute CM hi a hrilh.