Mizo pa lâr C Rokhuma a thi

India rama civil mite chawimawina sang Padma Shree dawng tawh leh Central YMA president hlui, C Rokhuma (100) h/o Lalrinthangi, Mission Vengthlang chu nimin chawhma dar 11:30 khan a thi a; vawiin chhun dar 12-ah an inah thlah a ni ang a, chawhnu dar 2-ah biak-inah vui a ni ang.

C Rokhuma hi July 21, 1917-ah Reiek khuaah a piang a, a pa chu Liandala niin, a nu chu Chhawni a ni. October 26, 1939-ah Lalrinthangi nen an innei a, fa pasarih, mipa pali leh hmeichhia pathum an nei.

Zirna lamah, kum 1933-ah pawl 6 a zo a, Dawrpui School-ah zirtirtu hna thawk nghalin, a hnuah Shillong-ah Electrical Mechanical Engineering zir zoin, Indopui Pakhatna laiin sipaiah a ṭang a, indo zawhah a báng. Sipai
aṭanga a bàn hnuah zirtir-tuah ṭang leh a ni.

C Rokhuma hi mi taima leh thil chîk peih tak a ni a, Mizorama mau-tâm thleng ṭhin leh a kaihhnawih thil chi hrang hrang a zir chiang ṭhin a, a hmuh chhuah ṭhen-khatte chu India ram chhung leh páwna mithiamte pawhin an hlut hle. Mizorama serthlum rah a puitlin hmaa a tlak vak vak ṭhin chhan zir chiangin, thlangdár vang a ni tih a hmuchhuak a; thlangdár thahna hlo siam chhuakin, a hmingah 'RK Mixture' a vuah.

Mizorama ruahtui tlak dan kum tin a chhinchhiah ṭhin a, a tehna atan ama siam ngei a hmang ṭhin. Mission Vengthlanga a in bul huanah ngaw siamin, nungchate an ngam theih nan an ei duh zawng thing a phun ṭhin a ni.

Lehkha ziak mi a ni a, 'Tunlai Khawvel Thlirna' tih lehkhabu chi hrang hrang a tichhuak ṭhin a; Gulf War (1991) lai vela a ziah phei chu chhiar a hlawh hle. Kum 1978-a Mizo Writers Association dintute zinga mi niin, President hmasa ber a ni a, kum 2000 thleng president a ni. Kum 1964 aṭangin kum nga chhung Mizo Academy of Letter vice president a ni bawk.

Kum 1953-57 chhung Central YMA president a ni a; kum 1978-ah Mission Veng-thlang Presbyterian kohhran upa-ah thlan niin kohhranah dinhmun pawimawh tak tak a chelh.

Mipui vantlang tana a thawh hlâwk avangin India sorkarin 'Social Work' category-ah kum 1992 khan Padma Shree a hlan a, Mizoram sorkarin Honorary Wildlife Warden nihna a pe.

Israel sorkarin kum 1992-ah Jerusalem Pilgrims title a pe a; kum 1998-ah thu leh hla lama a thawh hlâwk avangin American Biographical Institute-in Man of the Year certificate a hlan, kum 2005 khan mi zahawm a nih entir nan NETV People's Choice Award a dawng bawk.

C Rokhuma hi Mizo ram leh hnam tana a thawh ṭhat avangin Vanglaini-in Mizo Award a siam hmasak berah pawh thlan chhuah theih tur zinga chhhawp chhuah mi pasarih zingah a lo tel tawh a ni.