Zira'n Bio-Resources Stall a hawng

Central YMA-in  CYLA leh MTP-te nen ṭanghoa November 25-a Lammuala Joint Cultural Meet-cum-Bio-Resources Festival an buatsaih tur puala Lammual sira sorkar department ṭhenkhatin Bio-Resources Stall an siam chu nimin khan Agriculture minister R Lalzirliana'n a hawng.

R Lalzirliana chuan, kut hnathawktu, mahni kutkawih ngeia ei hmuh tumte thlai tharte leh thil siam chhuahte pho chhuahna atana Bio-Resources Stall buatsaih a ni chu lawmawm a tih thu a sawi a, "Mizoramin ei leh bar kawngah hmasawnna kan neih theih nan taimak a pawimawh a, mi dang ṭanpuina tel loin mahnu kutkawih ngei hmanga ei hmuh tum hi Kristian rama chengte tih tur a ni," a ti.

Bio-Resources Stall-ah hian Mizoram thar chhuah thlai leh thei te, Mizo kutchhuak puan, mau leh hrui-hnáng aṭanga thil siam te, pangpar te, ramhmul damdawi te, hnáng aṭanga thil siam te, bawnghnute aṭanga siam-te leh thil dangte phochhuah a ni.