North East NSS Youth Festival tan

24th November, 2016

National Service Scheme (NSS) Regional Centre (NER), Guwahati leh NSS (Cell) Mizoram leh Sports & Youth Services (SYS) department ṭangkawp chuan nimin khan Art & Culture auditorium, Berawtlangah North East NSS Youth Festival an buatsaih ṭan a, Sports & Youth Services minister Zodintluanga'n a hawng.

Zodintluanga chuan, "NSS volunteer-te'n ṭanpui ngaite
ṭanpui a, mi dang tan hmasawnna thlen tura an thawh ṭhin hian anmahniah ngaihtuahna leh miziaah hmasawnna ṭha tak a siam ṭhin a, NSS hmalakna hi ṭhalaite kaihruaitu ṭha tak a ni," a ti a; kum thum chhung a zawna Mizoramah North East NSS Festival nghah a nih chu lawmawm a tih thu a sawi.

Hmarchhak state hrang hrangte chu inunauna ṭha tak neia chhawm nung zel tur an ni tih sawiin Zodintluanga chuan, "North East mi nih vanga state dangte aia hniam bik riau anga inngaihna kan nei tur a ni lo," a ti a; ṭhalai kalkhawmte chu nun ze mawi leh zahawm tak te, aia upate zahna hre chung leh chawr chhuahna theihnghilh loa hma sawnna kawng zawh zel zawk turin a chah.

Khualzahawm, parliamenatry secretary (SYS) Hmingdailova Khiangte pawhin thu sawiin, Festival hmang tura kal khawm-te'n a hlâwk thei ang bera hun an hman a duhsak tih a sawi a, "Hmarchhak mite hian India ram hmun danga en hrante tâwkin, harsatna hrang hrang tâwk an awm ṭhin hi a pawi. Min hmuh dan thlak danglam tur leh kan nun ze mawi, taimakna leh thluak ṭha tak takte hi India ram mipuiin zau zawka an hriat theih nan mawhphurhna kan nei a ni," a ti.

Festival hawn inkhawm hi SYS secretary HL Rochung-nunga'n kaihruaiin, MZU NSS (Cell) programme co-ordinator prof. P Rinawma leh NSS Regional Directorate (NER) regional director Sunil K Basumatary te pawhin thu an sawi.

Festival chhung hian cultural progamme an hmang dawn a; human trafficking, voluntary blood donation, mental health, HIV/AIDS awareness leh thupui dangte an zirho bawk ang.

NSS hi September ni 24, 1969 khan khatih hun laia Union minister Dr. VK RV Rao-in a din a, Mizoramah chuan 1972 khan din ṭan niin, tun dinhmunah hian NSS Unit 321 awmin, volunteer 23,100 chuang an awm tawh. NSS hian a tum ber pakhat chu khawtlang tana tangkai thei tur hna hrang hrang tlawmngaia thawk a, chumi hmang chuan thalaite nun kai hruaia ‘personality development’ ṭha tak siam a ni.