MNF-in bye-election-ah che ṭha an inti

MNF chuan thuchhuah siamin, November 18, 2016-a Chakma Autonomous District Council (CADC) hnuaia village council bye-election-ah hleih nei taka thil tih a ni chungin, MNF-in V/C pahnihah hnehna an chang tih an tarlang a, "VC leh LC bye-election-ah MNF-in hma a sawn zel," a ti.

MNF chuan, CADC chhunga Kurbalavasora, Saizawh 'W', Long-puighat-II leh Golasury-ahte V/C bye-election neih a ni tih sawiin, "State Election Commission-in hriattirna a chhuah-ah opposition party a hriattir ve lo a, tum lâwk nei ràn emaw, hleih nei taka sorkarin notification a tichhuak kha MNF chuan ṭha lo a tiin boycott hial a duh a, buaina chawh chhuah a duh loh vangin ngawih a chuh mai a ni," an ti.

Hleih nei taka thil tih a ni chungin MNF-in Saizawh 'W' leh Longpuighat-II ah hnehna a chang tho tih sawiin, MNF thuchhuah chuan, "November 22, 2016-a Mara district-a V/C bye-election seat panga awmah chuhtu awm loin MNF-in a la fai vek bawk," a ti a; MNF-in hnehna an chang zel chu lawmawm an tih thu a tarlang.

MNF chuan, "Congress sorkar kal vung vanglai, NLUP leh NEDP bakah, contract leh supply-te leh therhlo hrang hrang hmanga mipui an vehthlêm laia MNF-in hma a sawn zel hi lawmawm kan ti a, he thil hian kum 2018 inthlanpuiah Pathian leh mipui zarah MNF-in sorkarna a siam ngei tur hrilh-lâwknaah kan ngai," an ti. Chawlh-hmun LC bye-election awm turah pawh chak ngei an inbeisei thu an sawi bawk.