Ramri ngaihsak turin sorkar phût

Hachhek Constituency Deve-lopment Committee (HCDC) hruaitute chuan, an chairman Lalzawna Pachuau hoin nimin khan Mizoram leh Assam inrina Medili lui an tlawh a, ramria himna atan a rang lama hma la turin Mizoram sorkar an ngen.

HCDC thuchhuah chuan, ramri bulah Assam sorkarin World Bank hnuaiah kawng an siam dawn tih tarlangin, "Mizoram chhunga Kanhmun khaw bul thlengin hma an rawn la a, hei hi HCDC chuan kan duh lo. Mizoram sorkar hi a rang lama ramri him theih nana hma la turin kan ngen a ni," an ti.

Tun hnaiah Assam sorkarin Medili lui bul Mizoram chhung-ah ramri chhinchhiahna 'pillar' an siam nia sawiin, HCDC chuan, "Hei vang hian KDZKT kawng laih hna kal mek pawh Assam sorkar hian hnathawktute a lo chawlhtir tawh a, hei hi HCDC chuan ṭha lo kan ti hle," an ti a; Medili lui bul Mizoram lamah tun hmaa Mizoram Environment & Forest department-in quarters an sak luah lai mekte an la awm niin an sawi.

HCDC-in ramri an enfiah-naah hian YMA Langkaih Group, MZP Headquarters Zawlnuam leh Kanhmun V/C-te pawh an tel a ni.