Raicheha thi tihtlem dan tur sawiho

Nimin khan Lungleia RNTCP conference hall-ah ni thum awh tur, Sensitization Meeting on Maternal Death Review Meeting ṭan a ni a, ni thum a awh ang. Nau chunga nu thihna tihtlemna tura hmalakna hrang hrang leh hmachhawpte an sawiho.

Review meeting kaihruaitu Dr VLMS Dawngliana, Lunglei chief medical officer chuan, Lunglei district-ah kum dang aiin kuminah raicheha thi an tlem thu sawiin, "Maternal death titlem turin mipuite'n an rilru sûkthlêk an siam danglam a ṭul a, nu naupai an awm chuan an dinhmun a derthâwng a, dimdawi taka enkawl an ngai tih hria a, a hun leh hmun dik taka enkawlna pek a ṭul," a ti.

Dr VLMS Dawngliana chuan, nau chunga nu thihna titlem turin sorkarin theihtawp a chhuah tih a sawi a; nau pâi zawng zawngte'n damdawi lama thawktute pan nacháng an hriat a pawimawh thu leh damdawi-in panna tur nei lo tan pawh damdawi-in panna man Rs. 3,000 thleng sorkarah bill theih a nih thu a sawi bawk.

Lungleia Reproductive and Child Health (RCH) programme manager PC Lalhmunsiama chuan, Lunglei district-a maternal death thlen chhan leh dinhmun hrang hrang a tarlang a; kum 2016-17 chhungin Lunglei district-ah nu nau chunga thi pakhat a awm tawh a, Mizoramah a tlem berna district an nih mek thu a sawi. Lunglei senior medical officer Dr Lalawmpuia Chhangte pawhin thu a sawi.

Review meeting-ah hian Lunglei district-a damdawi-in (CHC leh PHC)-a thawk te, ICDS-a thawkte bakah, MJA, YMA leh MHIP aiawhte an tel a ni.