Champhai ṭhalaite'n damdawi-ina Thawktu indaih lohna an sawiho

Champhai Ṭhalai Pawl (CṬP) chu Thawh-lehni zan khan Champhai Vengthlang YMA Rûn-ah an ṭhukhawm a; Cham-phaia polytechnic building sak zawh tawh a taka la hman loh leh Champhai District Hospital-a thawk-tu indaih loh chungchang an sawiho.

CṬP chuan, Champhai District Hospital-ah thawktu indaih lohna vangin mipuite'n harsatna an tawh mek thu sawiin, "Kan damdawi-in hi district pakhat chauhin kan hman a ni lo a, khaw-chhak lam unaute thlengin an rawn pan avangin thawktute'n nasa takin harsatna an tawk mek. District dang nena khaikhin chi a ni lo a, kalkawng a thui avangin hmunpui lam pan tur pawhin harsatna tam tak mipuite'n an tawk a, nunna hial chân an awm tawh," an ti.

Champhai District Hos-pital-a thawktu indaih loh vanga harsatna chu Mizoram sorkarah thlen phawt an rel a, 'Awmzia a awm loh chuan ngaihtuahna thar hman leh ni se,' an ti. District dangte'n sorkar an nawr anga nawr chu thiam ve tho mah se, innawr ngai loa theihtawp chhuah phawt an tum thu an sawi.

CṬP chuan Champhai District Hospital-ah hian doctor 11 an awm mek thu tarlangin, "District ṭhenkhatah doctor 34 an awm chung pawha an lungawi loh laia Champhaia doctor 11 chiah kan nei hi a lungchhiatthlak hle," an ti.

Polytechnic building chung--changah, CṬP chuan, "Mi-nis-try of Human Re-source Development-in Rs. 12,30,-00,000 a pek aṭanga Tlang-sama polytechnic building sak zawh tawh tun thlenga Mizoram sorkarin a la kalpui theih loh hi kalpui vat a nih theih nan sorkarah ngen ni se," an ti.