Kau-Tlabung leh Tuipanglui-a thutlukna Sorakrin High Court-ah khin let a tum

Kau Tlabung Mini Hydel Project (MHP) leh Tuipanglui MHP thubuaia Aizawl District & Session Judge thutlukna siam chu Mizoram sorkarin Gauhati High Coourt, Aizawl Bench-ah a khinlêt a tum.

Kau-Tlabung MHP leh Tui-panglui MHP thubuaiah hian Special Judge (PC Act) Lucy Lalrinthari chuan October 27, 2016 khan thutlukna a puang a, eiruknaa inhnamhnawiha puhte chu thiam a chantir. Thubuai hi October 25-27, 2016 chhung khan Special Court chuan a ngaihtuah a, thubuai chhuitute'n finfiahna an neih loh thu a tarlang a ni.

Special Judge chuan, 'Hetianga thil dik lo finfiahna awm loa Court-a thil ngaihtuah hi hun khawralna mai a ni' a ti a; prosecution lamin finfiahna an nei loa a hriat avangin thuhretu (witness) pawh koh ngai ti loin thubuai a titawp.

Thu dawn danin, Aizawl District & Session Court-a sorkar ukilte chuan Special Judge thutlukna chu a dik tawk loa an hriat avangin, dik tâwk loh an tih hrang hrangte tarlangin, Gauhati High Court-a khing lêt turin sorkarah rawtna an thlen. Sorkar chuan, sorkar ukilte rawtna chu a zir chian leh a ngaihtuah hnuah November 21, 2016 khan High Court-a khing let tura rawtna a pawm a ni.

Gauhati High Court-a zualko an duh chhan Vanglaini palai zawhna chhangin, District Court-a sorkar ukil RC Thanga chuan, "Special Judge thutlukna hi a dik tâwk lo kan ti lo thei lo," a ti.

RC Thanga sawi danin, thubuai ngaihtuah a nih rêng rêngin, Court-in thubuai ngaihtuah tlak a nih leh nih loha thutlukna (charge frame) a nih hmain, police-te'n chargesheet an thehluh chu zir chian a, ngaihtuah zui zel tlak a nih leh nih lohah thutlukna siam ṭhin a ni. Thubuai neite ukil (defence counsel) chuan charge frame hmaa thubuai tihtawp tumin theihtawp an chhuah ṭhin thung.

Charge frame a nih hma chuan document pawimawhte zir chian a nih ngai loh bakah, thuhretu pawh koh an ni ngai lo. Kau-Tlabung MHP leh Tuipanglui MHP thubuaiah hi chuan charge frame a nih hmain defence counsel-te document thehluh leh thuhretute thusawi hmangin thubuai tihtawp a ni. Sorkar ukil lamin defence counsel-te document an hnial hman loh bakah, thuhretu pawh an ko ve hman lo.

District & Session Court thu-tlukna khinglet tur hian Gauhati High Court-a sorkar ukilte chu an inbuatsaih mek a, document pawimawh hrang hrangte an khawnkhawm mek a ni.

He thubuaiah hian project pahnih thawh a nih laia PWD chief engineer Liansanga chu a thuneihna hmang suala contract thawh dan tura ruahman sa tidanglam a, contractor hlâwkna tura thil tia puh a ni. Project thawh laia P&E superintending engineer Lalnunmawia Sailo, SDO Laldawngliana leh supplier Swopan Kumar Roy-te chu wire-mesh hlûm (roll) 66 man pek chhuah si, a tak hmuh tur awm lo chungchangah thubuai siamsak an ni bawk.