Hnam lâm thiam ber - Ramthar North YMA

Art & Culture department leh Central YMA-in Lammuala ni hnih awh hnam lâm intihsiakna, 12th Chief Minister’s Running Trophy in YMA Cultural Dance Competition 2016 chu nimin khan khar a ni a, chief minister Lal Thanhawla'n lawmmante a sem. Lâm pathuma tiṭha ber chu Ramthar North Branch YMA an ni.

Khârna inkhawmah CM Lal Than-hawla chuan, mahni hnam nunphung leh ziarângte chu zahpui leh ṭhansan chi a ni lo tih sawiin, "Kan changkan ang zelin kan culture-te hi kan ngaisangin kan chhawm nung zel tur a ni," a ti.

YMA chu Zo nun ze mawi tung dingtu leh chawisangtu, ṭhalaite kaihruaitu a ni tih sawiin, "Kan hnam a tlukchhiat loh nan theihtawp chhuaha kan ṭan tlan a ngai a, hemi kawngah hian ṭhalai kaihruaitu leh sorkar pawh thurâwn pe a, kawng engkima thawhpuitu YMA hi an pawimawh em em a ni," a ti.

Chief Minister chuan, khawtlang nun siamṭhatna leh ram leh hnam siamna kawngah ram leilung fa zingah bâng thei an awm lo tih sawiin, "Kan zavaia mawh a ni a, a chhiat leh a ṭhatah mawh kan phur vek a, YMA hmalakna tichak turin YMA branch tinte an pawimawh," a ti.

Ṭanrual chu chakna a ni tih sawiin, "Kan zavaia kan ṭanrual chuan hnam zahawm leh hnam ropui kan ni thei," a ti a; Mizo hnam ziarángte chhawm nung a, chawi vul a, siam ṭhat ngai laite siam-
ṭha a kal turin YMA member-te a chah.

Art & Culture minister R Romawia pawhin thu sawiin, Mizo hnam ziarángte chu zahpui loh tur a nih thu sawiin, "A vul zel nan theihtawp kan chhuah a ngai a, mahni hnam ziaráng zahpuite chu hnam ropui an ni ngai lo. Khawvel khawi hmunah pawh awm ila, kan
ṭawng, kan hnam lâm leh sakhuate hi kan humhim zel tur a ni," a ti.

CM’s Running Trophy in YMA Cultural Dance Competition-ah hian tel turin YMA branch 56-in hming pe mah se, branch 38 chiah an lám thei a, chu'ng zinga branch pali chu Aizawl páwn
aṭanga tel an ni. YMA branch-te chu Cheraw (Kântluang), Chawnglaizawn leh Tlanglâmte hmangin an intihsiak.

A pumpuia tiṭha ber chu Ramthar North Branch an ni a, Vaivakawn Branch pahnihna niin, pathumna chu Chaltang North Branch an ni. Ramthar North Branch hi CM Running Trophy hnuhnung ber, kum 2013-a neihah pawh pakhatna an ni tawh.

Ramthar North Branch hi Cheraw, Chawnglaizawn leh Tlanglamah pakhatna an ni vek a, Vaivakawn Branch chu pahnihna an ni vek thung. Cherawah Armed Veng Branch pathumna an ni a, Chawnglaizawnah Chaltlang North Branch pathumna niin, Tlánglàmah Chanmari Branch pathumna an ni.

CM Running Trophy in YMA Cultural Dance Competition hi kum 1993-ah nei ṭan a ni a, kum kar thlakin neih ṭhin a ni.