Mizorama HIV hrik pâi mi 13,040 an awm Thla 7 chhungin HIV+ve 1,666-in an pung

Mizoramah kum 1990-a HIV hrik pai hmuh a nih aṭanga kumin June thla tawp thleng khan thisen endik tawh mi 5,54,644 zinga mi 13,040-in HIV hrik an pai tih hmuhchhuah a ni tawh a; AIDS vangin mi 1,313 an thi tawh. Thla sarih (April-October 2016) chhungin HIV hrik pai hmuhchhuah mi 1,666-in an pung.

Mizoram State AIDS Control Society (MSACS) report hnuhnung ber, June 2016 thlenga Mizoram dinhmun an tarlana a lan danin, thisen endik tawh mi 5,54,644 zinga mi 1,89,177 chu nu naupai thisen endiksak an ni a, nu nau pai zinga mi 1,272 chuan HIV hrik an pai tih hmuh chhuah a ni. Thisen endik dang zawng mi 3,65,467 chu general client an tihte an ni a, chu'ng zinga mi 11,768 chuan HIV hrik an pai.

Thisen endik tawh zat mi 5,54,644 aṭanga chhûtin, HIV hrik pai hmuh chhuah zat hi 2.35% a ni a; kum 2011 chhiarpuia Mizorama mihring awm zat 1,097,206 aṭanga chhûtin 1.19% a ni thung.

HIV/AIDS vangin June 2016 thlengin Mizoramah mi 1,313 an thi tawh a, chung zinga mi 833 chu mipa niin, mi 451 chu hmeichhia an ni a, mi 29 chu naupang an ni.

MSACS chhinchhiah danin, general client (nu nau pai tel loin) HIV hrik pai mi 11,768 zinga 7,451 chu mipa an ni a, mi 4,317 chu hmeichhia an ni. HIV hrik pai hmuh tawh mi 13,040 zinga 7,451 chu mipa an ni a, 8,091 (68.75%) chu mipat hmeichhiatna aṭanga kai an ni a, mipa 4,537 leh hmeichhia 3,554 an ni.

Mipa, anpui kawp aṭanga kai mi 65 (0.55%) an awm bawk. Ruihhloa inchiuna aṭanga kai mipa 2,490 leh hmeichhia 434, an vaiin mi 2,924 (24.85%) an awm a; nu aṭanga kai mipa 200 leh hmeichhia 214, an vaiin 414 (3.54%) awmin, kai chhan hriat chian lo mipa 159 leh hmeichhia 115, an vaii mi 274 (2.33%) an awm bawk.

HIV hrik pai zinga a tam ber chu kum 25-34 inkar an ni a, mipa 3,320 leh hmeichhia 1,662, an vaiin mi 4,982 (42.34%) an ni. Kum 14 hnuai lam mipa 214 leh hmeichhia 230, an vaiin mi 444 (3.77%) an ni a, kum 15-24 inkar mipa 1,526 leh hmeichhia 1,043, an vaiin mi 2,569 (21.83%) an ni. Kum 35-49 inkar HIV hrik pai mipa 2,018 leh hmeichhia 1,196, an vaiin mi 3,214 (27.31%) an awm a; kum 50 chung lam mipa 373 leh hmeichhia 186, an vaiin mi 559 (4.75%) an awm.

HIV+ve zinga 9,258 chu ART Centre-ah an inziak lut tawh a, mi 5,798-in ART damdawi an la tawh a, tuna la mek zat chu mi 4,466 an ni.

August 12, 2016-a Health minister Lal Thanzara leh MSACS project director Dr Lalmalsawmi Sailo ten minister pisaa Mizoram Synod hruaitute an kawmnaah, MSACS Project Director chuan March 2016 thlengin Mizorama thisen endik tawh 3,52,737 zinga mi 11,374-in HIV hrik an pâi tih hmuh chhuah a nih thu a sawi.

MSACS Project Director report aṭanga a lan danin, kumin April-October (thla sarih) chhungin Mizorama thisen enfiah tawh zat mi 2,01,907-in an pung a; thla sarih chhung hian HIV hrik pai mi 1,666 (13,040 - 11,374 = 1,666) hmuhchhuah an ni. Mipat hmeichhiatna hman aṭanga kai pawh thla sarih chhungin 183 an awm belh bawk.