KHAWTHLIR

Thisen pe

Chawlhhmun Branch KṬP chuan nimin khan Synod Hospital tan thisen unit 22 an pe a, a petute mipa 20 leh hmeichhia pahnih an ni. Nimin vek khan Dur­tlanga awm BSF sipaite chuan Aizawl Civil Hospital tan thisen unit 33 an pe bawk.

Births & Deaths Registrar training

Births & Deaths registrar-te pualin nimin khan Economics & Statistics conference hall-ah training buatsaih a ni. Niminah chuan Aizawl khawpui páwna mite tan buatsaih a ni a, vawiinah AMC huam chhunga mite tan buatsaih leh a ni ang. Mizoramah Births & Deaths registration unit 847 a awm a, Aizawl district bikah unit 104 awmin, AMC huam chhungah unit 99 a awm. AMC hian Aizawl khawpuia unit 99-te chu August 1, 2016 aṭangin a enkawl ṭan a ni.

MLA hluite sûn

Former Legislature Association of Mizoram (FLAM) chuan nimin khan an pisaah kumin atana ṭhutkhawm hnu­hnung an nei a; kumina an member thite- Assembly deputy speaker hlui LP Thangzika, Lalthangliani Sailo leh minister hlui J Lalthangliana te sûnna hun an hmang.

Vaikhawtlangah MST bus enchhin

Transport department chuan November 28, 2016 khian Kawlbem kaltlangin Vaikhaw­tlangah MST bus a tlantir chhin dawn. MST tlantir tur hi enchhina a nih angin, tlan chhunzawmtir a nih dawn leh dawn loh chu an la ngaihtuah ṭha leh ang.

C Rokhuma vui

November 23, 2016 chawhma dar 11:30-a thi, C Rokhuma (100), Mission Vengthlang chu nimin khan vui a ni. Padma shree dawngtu C Rokhuma hi an ina thlah a nih hnuah, kohhran upa a nih angin, chawhnu dar 2-ah Mission Vengthlang Presbyterian Kohhran biak-inah vui a ni.