Bru hruai kîr dan tur Delhi-ah sawiho

Mizoram Bru, Tripura-a awm mekte Mizorama hruai kîr dan ngaihtuah tura din, Joint Monitoring Group (JMG) chu nimin khan chhun dar 12:30 khan Ministry of Home Affiars conference room, New Delhi-ah an ṭhukhawm a; MHA-a special secretary (Internal Security) Mahesh Kumar Singla-a'n a ho.

Meeting-a Mizoram aṭanga telte chu - Home department-a additional secretary Lalbiakzama leh OSD David H Lalthangliana, Central YMA vice president Vanlalruata te an ni a, Tripura sorkar aiawhin official pakhat a tel.

Mizoram Bru Displaced People Forum (MBDPF) president A Sawibunga chu Court thubuai vangin a tel thei lo a, vice president R Laldawngliana leh general secretary Bruno Msha te an tel.

Thu dawn danin, Tripura
aṭanga Bru hruai kîr tur hian Home ministry lam chu an hmanhmawh viau a; mahse, Mizoram sorkarin Bru lak letna atana ruahmanna (road map) a siam, November 29, 2016 aṭanga ṭan tura tih chu tihfel ngai a la tam avangin zawm a harsat an rin thu an sawi.

Rs. 500 leh Rs. 1,000 note tihthih a nih vang leh sorkar laipuia ministry dang kaihhnawih thil tihfel ngai la awm avangin January 2017 aṭanga hruai kir pawh a huphurhawm rih niin Mizoram sorkar aiawhte chuan an sawi.

Central YMA aṭanga meeting-a tel an vice president chuan, Bru-te chu Mizoramah kir thuai se an duh tih a sawi a; chutih rualin, Mizo mipuite hriatthiam theih chin pêl lo tura an duh thu a sawi bawk.

MBDPF hruaitute chuan, kum hnih chhung free ration leh tuamhlawmna Rs. 80,000 pek an remtih tawh bakah, thil phût thar an nei belh leh a; Mizorama an kirna tur hmuna in sak lâwk te, lo vahna tur ram ṭhehsak te, thla tin chhungkaw tin hnenah Rs. 5,000 ṭheuh kum hnih chhung pek te, an thiamnain a phâk tawk ang chhungkaw tinte sorkar hna pekte leh thil dang dang an phût belh a ni.

Nimina Joint Monitoring Group meeting hi an vawi thum
ṭhutkhawmna a ni a; a ṭul anga ṭhut-
khawm leh thuai ni se, an ti.