Power-ah NE-a tiṭha ber Mizoram - Lal Thanzara

Minister Lal Thanzarah chuan, Mizoram chu Rural Electrification Corporation Survey Report-ah India hmarchhak state zinga a tiṭha bera puan a nih thu a sawi.

Power & Electricity department enkawlnaa Chief Minister puitu Lal Thanzara chuan, nimina Aijal Club-a P&E Engineering Officers’ Association inkhawmpui vawi 17-na a hmanpuinaah thu sawiin, "Thingtlanga êng pek kawngah kawlphethaa hniang-hnâr zawk ṭhenawm state-te aia Mizoramin a tih ṭhatna chu P&E department-a thawkte leh contractor-te thawhrimna rah a ni," a ti.

Lal Thanzara chuan, mipuiin êng an neih ṭhat loh hlaua P&E officer-te leh an hnuaia thawktu, a tê ber thlengin mahni nunna thàpa thawk ṭhinte chungah lawmthu a sawi a; duty laia vanduaina tâwkte leh nunna chánte a tawrhpui thu sawiin, "Sorkar ang leh department anga tih theih apiang chu an chhungte chhawmdawl nan tih a ni ang," a ti a, P&E department hnuai-a hmalakna lian leh langsar, kum 2017 chhunga zawh hman beisei leh kum 2017 chhunga hmalak thar turte a sawi lang.

Minister chuan, New Economic Development Policy hnuaia Reform in Power Sector Managment-ah hma thar lakna tur kawng a inhawn zauh thu a sawi a; kawlphethaa hmasawnna tura ruhrel pawimawh din belh tur te, power supply system tihhmasawnna turte leh khaihlak loa mipuiin êng an neih theihna tura ruahmanna siam turin P&E engineer-te a chah.

Lal Thanzara'n kum 2017 chhunga thawh zawh tur a sawite chu - Tlawva SHP (megawatt 5), Kawlbem SHP (megawatt 4), Melriat-Lunglei 132 kV sub-station (km. 110), Buarpui-Saiphai 33/11kV sub-station, Kolasib-Aizawl 132 kV sub-station line D/C tower leh, 132kV sub-station sawnna turte a ni.

Kum 2017 chhunga hmalakna thar tur a sawite zingah - Aizawl-Sialsuk 33kV line on tower, lawngtlai 33kV sub-station, Teirei Hydel project (megawatt 3) tuaithar, Tuipanglui Hydep Project (megawatt 3) tuaithar, Maicham Hydel Project (megawatt 2) tuaithar, Thenhlum 33kV sub-sation leh Zaizawhtlang 33kV sub-sation tuai thar, West Phaileng 132 kV line leh, Bairabi via Mamit (km. 74) siam hna thawhte a tel.

PEOA inkhawmpui hi an president Lalramliana, P&E chief engineer-in a kaihruai a; kum 2016-17 chhunga an member thite sûnna hun an hman bakah, kumina superanuation pension-a chhuakte thlahna hun an hmang. P&E engineer-in-chief Liannghinglova Pachuau-in thu a sawi bawk.