Raj Bhavan building thar Larsapin a hawng

Raj Bhavan Secretariat building sak thar pakhat chu nimin khan Governor Lt.Gen. Nirbhay Sharma-a'n a hawng. Larsap chuan, project reng reng thawh zawh hun leh sum sen tura bituk sa (estimate) pelh loh leh a ṭha thei ang bera thawh a pawimawh thu a sawi.

Governor Nirbhay Sharma chuan, Raj Bhavan-a in thar sakte chu Mizoram leh Mizo mipui darthlalang a ni dawn tih sawiin, hmun dangte entawntlaka sak a pawimawh thu a sawi a, "Mizoram páwn aṭanga mithiam chah chhuah ngai loin Mizo engineer-te an thiam tawk a. Project reng rengte thawh zawh hun leh sum sen tura bituk sa pelh loh hrâm a, a ṭha thei ang bera thawh hi kan tihmâkmawh a ni," a ti.

Larsap chuan, Raj Bhavan Secretariat thar sakna turin kum 2011-ah a lungphùm phùm a nih thu sawiin, "PWD-te'n theihtawp chhuahin hun rei lo teah in thar mawi tak hawn a ni thei hi a lawmawm hle," a ti a; Raj Bhavan hlui (heritage building) leh Governor’s Secretariat Office leh Durbar Hall turte pawh sak ṭhat mek a nih thu a sawi.

CM Lal Thanhawla chuan, Raj Bhavan-in Mizoram history-ah hmun pawimawh tak a luah thu sawiin, "A hmasa berin Superintendent of Lushai Hills chenna a ni a, Mizoram union territory-a puan a nih hnuah Raj Niwas tih a ni a, Mizoramin state a neih hnuah Raj Bhawan tia hriat a ni," a ti.

Chief Minister sawi danin, 13th Finance Commission hnuaiah Raj Bhavan sak ṭhatna tur sum hmuh a ni a; INTACH Mizoram Chapter hmalakna avangin Raj Bhavan chu hmun hlui humhim tur, heritage site-ah puan a ni.

PWD chief engineer (Building) Henry Lalmuankima sawi danin, Raj Bhavan Secretariat sak ṭhat hna Brahmaputra Infrastructure Ltd, Guwahati-in an thawk a; nimina hawn tâk Phase-I bik sak zawh nan cheng nuai 2118.50 hman a ni.

Raj Bhavan building thar hawnna inkhawmah hian minister pathum - R Lalzirliana, R Romawia leh H Rohluna te, MNF president Zoramthanga leh sorkar mi pawimawhte an tel.