CYMA, CYLA leh MTP-ten Joint Cultural Meet an hmang
Central YMA huaihawtin nimin khan Lammualah Joint Cultural Meet-cum-Bio-Resources Festival 2016 buatsaih a ni a; YMA bakah, Central Young Lai Association leh Mara Thyutlia Py (MTP) aiawhte an tel a, hnam lam leh zai chi hrang hrang entir a ni.
Joint Cultural Meet-ah hian chief minister Lal Thanhawla khuallian a ni a, Aizawla awm minister, parliamentary secretary, MLA leh sorkar department hotu ṭhahnem tak an tel. Sorkar aṭangin Aizawla higher secondary school zirlaite tel tura tih an nih angin, HSS zirlai ṭhahnem tak an tel bawk.
Chief Minister chuan, hnam fing apiangin an hnam ziaráng chawisâna chhawm nun leh nunpui nachâng an hria tih sawiin, YMA, YLA leh MTP-te'n Cultural Meet an buatsaih chu lawmawm a tih thu a sawi a, Meet chuan Zo hnahthlakte chu chhúngkhat vek an nih angin, inngeih tak leh inpumkhat tlat tura suihkhawmtu a nih a beisei thu a sawi.
Lal Thanhawla chuan, Mizote chu Kumpinu sorkarin ṭhen hrangin, khawvel hmun hrang hrang leh India state hrang hrangah chêng mah se, unau vek an ni tih sawiin, "Mizorama chêng, in nghaktute hian nu leh pa chan changin, hmun hrang hranga Zo hnahthlakte tana belh tlak inpui kan siam thiam a ngai. Neitu rilru pu
ṭheuha inpumkhata awm hi Pathian duh dan pawh a nih ka ring," a ti.
CM Lal Thanhawla chuan, ṭhalaite fuihna thu sawiin, ṭhalaite chu ram, khawtlang leh kohhran hruaitu turte an la nih avangin nu leh pate thu âwih a, aia upate zah thiam tur leh Zo nun ze mawi vawng nung zel turin a chah.
Khualzahawm Prof. Dinabandhu Sahoo, IBSD, Imphal director pawhin thu sawiin, Mizoramin hnam ziaráng hausa tak leh bio-resource lama theihna sang tak a neih avangin economy leh tourism lamah ṭhan len theihna tam tak a neia a hriat thu a sawi.
Central YMA president Lalbiakzuala chuan, Mizoram chu ram nuama siam turin a chhunga cheng zawng zawngte ṭanrual a ngaih thu a sawi a, "Mizorama chengte hi inla hrang tham kan awm lo a, hma kan sawn zel theihna turin lungrual taka kan ṭanho a ngai," a ti a; Joint Cultural Meet chuan rah
ṭha chhuah ngei se a duh thu a sawi.
Meet hi CYMA general secretary Lal-hmachhuana'n a kaihruai a; Art & Culture Director, MTP aiawh leh YLA aiawhte pawhin thu an sawi a ni.
Joint Cultural Meet-ah hian YMA aṭangin sub-headquarters panga Lunglei, Champhai, Kolasib, Serchhip leh Mamit aṭanga kalte'n Cheraw an entir bakah, Aizawla YMA branch thlan bikte'n hnam lâm dang an entir a; CYLA leh MTP aṭangin hnam lâm entir a nih bakah, zaithiamte'n hnam bil hla (folk song) an sa a, Mizorama zaithiam lârte an zai bawk.
Joint Cultural Meet-cum-Bio-Resources Festival pual hian Lammual sirah Bio-Resources stall eng emaw zat hawn a ni a; mipuite'n tláwm zawka an lei theih turin Mizo thil siam chhuah chi hrang hrang te, AYUSH damdawi, thlai leh thei thar chhuahte zawrh a ni.