Bank account mi dang hmantir lo turin hriattir

Finance department chuan thuchhuah siamin, mi tinte chu an bank account-ah mi dang pawisa dahtir lo turin an hriattir a, "Income tax chawi pumpelh tumte ṭanpuitu chu chhui zui tur an ni," an ti.

Ministry of Finance-in thu-chhuah a siam angin, mi tute'n emaw an black money tihnun nan leh income tax âwl nan mi hnenah pawisa hlawh tur tawktarhin, an bank account-a pawisa dah tura thlêm an awm thei tih tarlangin Finance department chuan, "Mizote hi tribal, income tax chawi lo kan nih avangin hetiang hi tawn palh theih a ni," a ti a; bank account-a pawisa dah dil an awm pawhin phal lo turin mipui a hriattir.

Finance department tarlan danin, bank account-a pawisa dah luh remti an lo awm a nih chuan income tax chawi pumpelh tura
ṭanpuitu anga ngaih an ni a, Income Tax Act hnuaiah an chungchang ngaihtuah leh chhui zui tur a ni.

Financedepartment chuan, November 24, 2016 zanlai aṭangin Rs. 1,000 leh Rs. 500 note tihthih ni mah se, December 30, 2016 thleng mahni account-ah dah luh theih a nih thu a tarlang a, "Bank-ah thleng theih a ni tawh. Pawisa tihthih a nih hnua bank account-a pawisa dah luh Rs. 2,50,000 leh a chung lam chu uluk taka enfiah a ni dawn a, mahni sum lak luh phû loa dah tamte chu chhui zui an ni ang," a ti.