KHAWTHLIR

Constitutional Day

Nimin, November 25 kha Dr BR Ambedkar pian champha a ni a, sorkar laipui chuan November 25 hi 'Constitutional Day' atan a puang a, hemi pual hian sorkar pisa leh zirna in hrang hrangah Constitutional of India Preamble chhiar chhuah a ni.

Eng awm dawn lo

Luangmuala 132KV Sub-Station chu vawiin hian siamṭhat a ni dawn a, tukin zing dar 9 aṭanga tlai dar 4 thleng kawlphetha pek chhuah theih a ni dawn lo. Hei vang hian vawiinah Aizawla chhim lam leh tlak lam veng hrang hrang te, chhimphei tlang dunga khua te, Mizoram University, Sairang leh a chhehvel khuate'n kawlphetha an hmu thei dawn lo.

Goodwill Visit

Uniting Presbyterian Church in Southern Africa hruaitute chu Goodwill Visit Programme hmangin Aizawlah an cham mek. United Presbyterian Church in SA hruaitu lo zinte hi Rev. Lungile Mpetsheni, Rev. George Marchinkowski, Rev. Boitumelo Gaborone leh Rev. Christopher Judelsohn-te an ni a, November 23 khan lo thlengin, December 1 thleng an châm ang. Mizoram Synod-in a lo thleng a ni.

Kohhran hmeichhia

Nimin November 25 khan Kohhran Hmeichhe Ni a ni a, Presbyterian Kohhran Hmeichhiate'n bial leh kohhran mal huapin an hmang. Koh-hran Hmeichhe Ni hi kum 1997-ah hman ṭan a ni a, November thlaa Zirtawpni hnuhnung berah hman ṭhin a ni.

Thawhlawm hlan

Mizoram Ṭhalai Kristian Pawl (MṬKP) hruaitute chuan nimin khan Lawngtlaia Christian Hospital an tlawh a, kumin ṬKP Day thawhlawm aṭangin Hospital Cabin sakna tur Rs. 1,00,000 an hlan. ṬKP Day thawhlawm hi MṬKP treasurer Malsawmtluangi'n Dr HS Lalchungnunga hnenah a hlan a ni.