Pension Adalat-cum-Ex Servicemen Rally

Defence Accounts Department (DAD) leh Indian Army ṭangkawp chuan, nimin khan Ṭhuampui Helipad-ah ‘144th Defence Pension Adalat-cum-Ex Servicemen Rally’ an buatsaih a, Governor Lt.Gen. Nirbhay Sharma-a'n a hawng.

Governor chuan, Mizoramah a hmasa ber atan Defence Pensioner Adalat huaihawt a ni chu lawmawm a tih thu sawiin, "Hemi tihhlawhtlin nana DAD hotute'n theihtawp an chhuah hi a lawmawm hle. DAD-in sipai bángte leh an chhungte pension an lakna dan tur tihawlsam nan CGDA hnuai aṭangin direct-a an account-ah thawn a nih theih nan hma an lak mekte hi a lawmawm tak zet a ni," a ti.

Ex-servicemen-te chu ram chhung hmun hrang hrangah awm tawh ṭhin leh hnam hrang hrangte nena chengho an nih avangin ram inpumkhatna leh inunauna kawngah an thawh hlawk hlea a hriat thu a sawi a; Mizoram ang state kilkhawra chengte chu mahni ṭawnga chiah hmang zinga ex-servicemen-te ang tawnhriat ngah leh ram hmu zau zawkte chuan Mizote'n
ṭawng dang an thiam belh nan leh Mizo ṭhalaite'n sipai lamah an luh tam theih nan theihtawp chhuah turin a chah.

Governor hian Pensioner Adalat hawnna inkhawmah hian sipai, nunna chán ta nupuite leh gallantry award dawng tawhte hnenah chawimawina a hlan a ni.

Controller of Defence Accounts N Neihsial pawhin thu sawiin, "Pensioner Adalat kan neih tawh zawng zawngah vawiin anga ex-servicemen leh an chhung-te kal ṭhat ka hre ngai lo," a ti a; Pensioner Adalat ni hnih an neih chhungin harsatna awmte tihfelsak vek an tum thu leh an tihfel theih lote chu kar khat chhunga
tihfelsak an tum thu a sawi.

Sorkar thuchhuah tarlan danin, One Rank One Pension (OROP) hman ṭan a nih hnuah pension-te nasa takin a khawih danglam a, pensioner leh an chhungte eng emaw zatin an sum lak zat tur hre lo. A ngai renga pawisa la late an awm tih hriain DAD chuan ram chhung state tin tlawh chhuaka pension lak dan turah harsatna neite tihfelsak an tum a ni.

Tun dinhmunah bank 46,000 kaltlangin defence pension pek chhuah mek a nih bakah, Nepal ramah ex-servicmen nuai khat chuangin pension an dawng. Kum khata defence pension sem chhuah hi cheng vbc. 8700 chuang a ni a, OROP hnuaia pension pek chhuah tur chu installment pali-ah sem a ni dawn.