NLUP vangin zirtirtu hlawh lak a khaihlak lo - NIB Chairman

Nimin khan Aizawl West-I leh West-II ah NLUP sem a ni a; an hun hmanpuitu, NLUP Implementing Board (NIB) chairman JH Roṭhuama chuan, NLUP vangin zirtirtute hlawh lak tur a khaihlak ngai lo niin a sawi.

JH Rothuama chuan, NLUP vanga zirtirtu hlawh lak a khaihlak
ṭhin nia sawi a nih thu sawiin, "Hei hi thu dik lo a ni. NLUP hi a hranpaa pawisa sorkar laipui
aṭanga kalpui, hmasawnna programme khawvel danga la awm ngai lo a ni. NLUP-in a tum zinga pakhat chu mi rethei bik awm loa Mizo mipuite khaihchhuah a ni a, chumi atan chuan theih ang ang-in ṭanpuina sem ṭhin a ni," a ti.

NLUP sem inkhawm hi Chawnpui Sports Complex-ah buatsaih a ni a, Aizawl West-I leh West-II chhunga Industries department hnuaia NLUP trade thlangtu mi 455 hnenah ṭanpuina pek a ni.

Inkhawma tarlan dan-in, Industries department hian NLUP ṭanpuina mi 27,114 hnenah an sem tawh a, sum an pek chhuah tawh zat chu Rs. 1,63,72,37,841 a ni.