Minister-in indoor stadium pahnih hawng

Sports & Youth Services minister Zodintluanga chuan nimin khan a bial chhung, Bunghmun khuaa Rs. 44,18,640 sênga sak indoor stadium a hawng a; chawhnu dar 3-ah Thenhlum khuaa indoor stadium sak thar a hawng bawk.

Zodintluanga chuan, "Ṭhalaite'n tih tur an nei lo a, ruih theih thilah an kal nasa lutuk a, kawng ṭha kan kawhhmuh theih nan infiamna hmun kan siam zel a ni," a ti a; kum 2008-a CM Lal Thanhawla kaihhruai Congress sorkar a din hnuah ṭhalaite tan infiamna hmunhma tam tak an siam tawh thu a sawi.

Ṭhalaite chu khua leh tui ṭha nih tum tura chahin Zodintluanga chuan, "Kan
ṭhalai kal sual, tleirawl tur tih tur nei loa nun kawng dik lo zawh turte infiamna aṭangin
kawng dik leh ṭha zawhtir tum ila, khua leh tui ṭha leh ram leh hnam tana ṭhaa inchher turin ka ngen che u a ni," a ti.

Sports Minister chuan, indoor stadium hawn tâkte chu an neitu an nih angin uluk leh dimdawi taka enkawl turin khaw mipuite a chah a; Thoráng bialah PMGDY sum hmangin Bung-hmun, Sesawm, Laisawral leh Marpara inkar kawng siam a nih thuai tur thu leh, Bunghmun-Lunglei kawng, Thenhlum-Bolia kawng leh Thenhlum-Changpui kawng siamna tur sum ruahman a nih tawh thu a sawi bawk.