Uniform Civil Code chungchang sawiho

Mizoram State Law Commission chu nimin khan an chairman, John Siamkunga, MLA hoin a pisaah an ṭhukhawm a, Uniform Civil Code chungchang an sawiho.

John Siamkunga chuan, member-te inpekna hlu tak avangin Law Commission-in hna ṭha takin a thawk ṭhin tih a sawi a, "Department hrang hrangte pawhin an dan hman laite zir chiang lehzual se, fel zawka mipui rawngbawl theihna atan a ṭangkai ka ring," a ti.

Uniform Civil Code hi hnam hrang hrang leh sakhaw hrang hrang betute a hranga anmahni dan hmang lo a, dan pakhat, India ram pum huap atana siam hman chung-chang a ni.

India ram mipui-te tana Uniform Civil Code chungchang hi Law Commission of India-in a ngaihtuah mek lai a ni a, rawtnate thehlut tura Law Commission of India-in a beisei angin Mizoram Law Commission pawhin a ngaihtuah a ni.

Meeting-ah hian, Mizorama hnam hrang hrangte'n hnam bil tih dan leh Assembly-in inneih leh inṭhen te, rokhawm chungchangtea dan a pass tawhte thlir chung leh, India danpui hnuaia Mizoramin Special Provision a neihte an thlirho a; Mizoram tana ṭha ber tur ngaihtuah chungin an rawtnate chu sorkarah thlen an rel a ni.